ប្រធានាធិបតីតៃវ៉ាន់ អ្នកស្រី សៃ អ៊ីងវិន (Tsai Ing-wen) បានថ្លែងកាលពីថ្ងៃពុធកន្លងទៅថា តៃវ៉ាន់ចង់ទិញអាវុធទំនើបពីសហរដ្ឋអាមេរិច ដើម្បីបង្កើនសមត្ថភាពការពារដែនគោក និងអាកាសរបស់តៃវ៉ាន់។
ថ្លែងក្នុងដំណើរទស្សនៈកិច្ចទៅកាន់កោះហាវ៉ៃ អ្នកស្រីបញ្ជាក់ថា សំណើរសុំទិញយន្តហោះចំបាំង F-16 និងរថគ្រោះ M1 ត្រូវបានដាក់រួចរាល់ហើយ។
គំរោងទិញសព្វាវុធទំនើបរបស់តៃវ៉ាន់នេះកើតឡើង ក្រោយពេលភ្នាក់ងារចារកម្មនៃក្រសួងការពារជាតិអាមេរិច បានធ្វើការព្រមានកាលពីខែមករាថា ចិនបានធ្វើទំនើបកម្មយោធារបស់ខ្លួនយ៉ាងលឿន ដើម្បីបង្ហាញសមត្ថភាពប្រឆាំងទៅនឹងប្រទេសមានទម្លោះក្នុងតំបន់ ដូចជាតៃវ៉ាន់ជាដើម ដែលចិនចាត់ទុកថាជាផ្នែកមួយនៃទឹកដីរបស់ខ្លួន។
ជុំវិញបញ្ហានៃដែរ ក្រសួងការពារជាតិរបស់ចិន បាននិយាយថា ប៉េកាំងប្រឆាំងដាច់ខាតទៅនឹងការលក់អាវុធរបស់អាមេរិច ទៅឲ្យតៃវ៉ាន់ និងទំនាក់ទំនងផ្នែកយោធារបស់អាមេរិច និងតៃវ៉ាន់។
អ្នកនាំពាក្យក្រសួងការពារជាតិចិនឈ្មោះ Wu Qian បាននិយាយថា “បញ្ហារបស់តៃវ៉ាន់គឺជាកិច្ចការផ្ទៃក្នុងរបស់ចិន ជាក្តីកង្វល់របស់ផលប្រយោជន៍ចិន និងជាបញ្ហាជាតិរបស់ប្រជាជនចិន។ ខ្លួនមិនអាចឲ្យមានការជ្រៀតជ្រែកពីផ្នែកខាងក្រៅឡើយ”។
“វិធានការដ៏គ្រោះថ្នាក់បែបនោះមិនមែនជាផលប្រយោជន៍របស់ភាគីទាំងសងខាងឡើយ”។
សូមបញ្ជាក់ថា តៃវ៉ាន់មានបំណងចង់ប្រកាសឯករាជ្យជាច្រើនលើកច្រើនសារ ប៉ុន្តែត្រូវបានចិនព្រមានថានឹងប្រើប្រាស់យោធាដើម្បីវាយយកតៃវ៉ាន់មកគ្រប់គ្រងវិញ បើហ៊ាន៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC