នាវាចម្លងដ៏ធំមួយគ្រឿង ដែលដឹកមនុស្សចំនួន ២៥១នាក់ បានលិចនៅក្នុងសមុទ្រភាគខាងកើត ប្រទេសភីលីពីន។
អ្នកនេសាទនៅតំបន់កើតហេតុ និងទូកជួយសង្គ្រោះ បានជួយសង្គ្រោះជីវិតមនុស្សជាង ២០០នាក់ដែលនៅលើទូក ប៉ុន្តែមានមនុស្សយ៉ាងហោចណាស់ ៤នាក់បានស្លាប់ និង ៧នាក់ផ្សេងទៀតបាត់ខ្លួន។ នេះបើតាមការបញ្ជាក់របស់ឆ្មាំសមុទ្រភីលីពីន។
អ្នកដំណើរបាននិយាយថា រលកធំៗ និងខ្យល់ខ្លាំងគឺជាមូលហេតុដែលធ្វើឲ្យនាវាចូលទឹក នៅក្បែរកោះ ប៉ូលីឡូ (Polillo) និងបានលិចយ៉ាងលឿន។
ក្រុមអ្នកជួយសង្គ្រោះបានឲ្យដឹងថា ពួកគេរាំងស្ទះប្រតិបត្តិការជួយសង្គ្រោះដោយសារតែភ្លៀងខ្លាំង និងមានរលកធំៗ។
អ្នកនាំពាក្យក្រុមឆ្មាំសមុទ្រម្នាក់ឈ្មោះ Armand Balilo បាននិយាយថា នាវាចម្លងនោះអាចផ្ទុកមនុស្សបានរហូតដល់ ២៨០នាក់ ហើយនៅពេលកើតហេតុវាមិនបានផ្ទុកលើសចំណុះនោះទេ។
លោកបញ្ជាក់ថា បញ្ហាអាកាសធាតុគឺជាហេតុផលចំបងដែលធ្វើឲ្យនាវាលិច។
ការលិចទូកតែងតែកើតមានជាញឹកញាប់នៅក្នុងប្រទេសភីលីពីន ដែលជារឿយៗកើតឡើងដោយសារតែព្យុះ៕ សុភ័ក្ត្រ
