តាកែវ ៖ ដើម្បីធានាអោយបាននូវសុវត្តិភាពសណ្តាប់ធ្នាប់ចរាចរណ៏នៅតាមដងផ្លូវ ក៏ដូចជានៅតាមគោលដៅសំខាន់ៗ តំបន់ទេសចរណ៏នានា ជាពិសេសនៅតាមវត្តអារាម ស្នងការនគរបាលខេត្តតាកែវ បានណែនាំ និងក្រើនរំលឹកទៅដល់មន្ត្រីនគរបាលទាំងអស់ ត្រូវតែបង្កើនការប្រុងប្រយ័ត្នឲ្យបានខ្ពស់ជាមួយនឹងការការពារសន្តិសុខសុវត្ថិភាពជូនបងប្អូនប្រជាពលរដ្ឋ នៅក្នុងឪកាសបុណ្យចូលឆ្នាំថ្មីប្រពៃណីជាតិខ្មែរ ដែលនឹងខិតជិតមកដល់នាពេលខាងមុខនេះ ។
ថ្លែងនៅក្នុងកិច្ចប្រជុំបូកសរុបសភាពការណ៍ និងកិច្ចសហប្រតិបត្តការរក្សាសន្តិសុខ សណ្តាប់ធ្នាប់សង្គមប្រចាំខែមីនា និងលើកទិសដៅសម្រាប់ខែមេសា និងពិធីចែកអាវកាក់ចំណាំងជិត៤៤០អាវ ជូនដល់មន្ត្រីនគរបាលទូទាំងក្រុងស្រុក នៅឯស្នងការដ្ឋាននគរបាលខេត្ត កាលពីថ្ងៃទី៣០ ខែមីនា ឆ្នាំ២០១៩ ឯកឧត្តម ឧត្តមសេនីយ៍ទោ សុខ សំណាង ស្នងការនគរបាលខេត្ត បានមានប្រសាសន៍បន្តថា ខណៈពេលដែលបុណ្យចូលឆ្នាំប្រពៃណីជាតិខ្មែរ ខិតចូលមកដល់នាពេលខាងមុខនេះ បងប្អូនប្រជាពលរដ្ឋពួកគាត់នឹងវិលមកស្រុកកំណើត មកជួបជុំបងប្អូនសប្បាយរីករាយ ដូច្នេះមន្ត្រីនគរបាលទាំងអស់ ត្រូវចូលរួមសហការគ្នាធានាអោយបាននូវសុខសុវត្ថិភាពជូនពួកគាត់ឲ្យបានល្អប្រសើរ ។
លោកស្នងការបានបន្តថា ក្នុងឱកាសបុណ្យចូលឆ្នាំប្រពៃណីជាតិខ្មែរខាងមុខនេះ នឹងមានបងប្អូនប្រជាពលរដ្ឋ រៀបចំនូវកម្មវិធីរាំលេងសប្បាយៗ ការលេងល្បែងប្រជាប្រិយ និងកម្មវិធីផ្សេងជាច្រើនទៀតនៅវត្តអារាម តំបន់ទេសចរណ៏ ឬតាមទីសាធារណៈ ដូច្នេះក្នុងនាមយើងជាសមត្ថកិច្ច សូមឲ្យអស់លោកទាំងអស់ ត្រូវតែរៀបចំផែនការការពារសន្តិសុខ សុវត្ថិភាពនេះឲ្យបានច្បាស់លាស់ ពោលត្រូវធានាអោយបានថា នឹងការពារសុវត្ថិភាព ក៏ដូចជាទ្រព្យសម្បត្តិរបស់ប្រជាពលរដ្ឋឲ្យល្អ ពិសេសគឺការសម្រួលចរាចរណ៍ដល់ពួកគាត់ធ្វើដំណើរ ឲ្យមានលក្ខណៈងាយស្រួល និងសុវត្ថិភាព ។
ជាចុងក្រោយឯកឧត្តម ឧត្តមសេនីយ៍ទោ សុខ សំណាង ក្រៅតែពីការការពារសន្តិសុខសុវត្ថិភាពជូនបងប្អូនប្រជាពលរដ្ឋក្នុងឪកាសបុណ្យចូលឆ្នាំប្រពៃណីជាតិខ្មែរ លោកស្នងការក៏បានណែនាំដល់មន្ត្រីនគរបាលទាំងអស់ ត្រូវធ្វើការអប់រំណែនាំដល់ប្រជាពលរដ្ឋ ឲ្យមានការប្រុងប្រយ័ត្នចំពោះអគ្គីភ័យគ្រប់ពេល ដោយមុននឹងចាកចេញទៅដំណើរកម្សាន្តនៅទីជិតឬឆ្ងាយ ត្រូវមើលភ្លើងទានធុប និងបិទភ្លើងអគ្គិសនី ឲ្យបានរៀបរយ ជៀសវាងបញ្ហាអគ្គីភ័យកើតមានឡើង នាំឲ្យបាត់បង់ទ្រព្យសម្បត្តិខ្លួនឯង និងអ្នកជិតម្ខាងផងដែរ មួយវិញទៀត គឺការបើកបរសូមអោយបងប្អូនប្រជាពលរដ្ឋទាំងអស់ត្រូវតែមានការប្រុងប្រយ័ត្នខ្ពស់ ជាពិសេសត្រូវចេះយោគយល់អោយគ្នាទៅវិញទៅមកក្នុងពេលបើកបរ និងគោរពច្បាប់ចរាចរណ៏ទាំងអស់គ្នា ដើម្បីសុវត្តិភាពខ្លួនឯង និងគ្រួសារផងដែរ៕ ដោយ ៖ តាកែវ
