ភ្នំពេញ ៖ ត្រីសម្រាប់ធ្វើប្រហុក ចាប់ផ្តើមត្រូវជាបណ្តើរៗហើយ ក្នុងរយៈពេលប៉ុន្មានថ្ងៃកន្លងមកនេះ ប៉ុន្តែតម្លៃត្រីថ្លៃជាងឆ្នាំមុន ខណៈដែលអ្នកពាក់ព័ន្ធមួយចំនួន បានប៉ាន់ប្រមាណថា ទិន្នផលត្រីឆ្នាំនេះ អាចនឹងថយចុះដោយសារទឹកទន្លេរាក់ ដែលមិនបានជន់លិចព្រៃលិចទឹកដែលជាជម្រកសម្រាប់ត្រីពងកូន។
មន្ត្រីជំនាញ បាននិយាយា ត្រីនឹងកាន់តែត្រូវច្រើនថែមទៀត នៅក្នុងអំឡុងពីរបីថ្ងៃខាងមុខនេះ ប្រសិនបើគ្មានការប្រែប្រួលអាកាសធាតុទេនោះ ប៉ុន្តែក្នុងរយៈប៉ុន្មានថ្ងៃនេះ ប្រទេសកម្ពុជាកំពុងរងនូវឥទ្ធិពលចុះត្រជាក់ខ្លាំង ។ ក្នុងរយៈពេលនេះត្រីចាប់ផ្ដើមធ្វើដំណើរចុះមកតាមខ្សែទឹកខាងក្រោមហើយការប្រមូលផលត្រីនឹងកាន់តែបានច្រើនប៉ុន្តែបើធាតុអាកាសអាប់អួ ឬមានភ្លៀងកក់ខែនោះត្រីនឹងមិនធ្វើដំណើរចុះមកខ្សែទឹកខាងក្រោមទេដូច្នេះការប្រមូលផលនេសាទត្រីក៏មិនបានច្រើនដែរ។
ដូចសព្វមួយដង ក្រសួងកសិកម្មរុក្ខាប្រមាញ់និងនេសាទ ក៏ដូចជារដ្ឋបាលជលផល ផងដែរ បានជូនដំណឹងដល់សាធារណជន ពីរដូវត្រីត្រូវដើម្បីធ្វើប្រហុក ផ្អាក ត្រីឆ្អើរ ជាដើម សម្រាប់ទុកបរិភោគប្រចាំឆ្នាំ។ រដូវត្រីត្រូវ ក្នុងរដូវនេសាទឆ្នាំនេះ នៅតាមដងទន្លេសាប ដែលអាចរកត្រីបានច្រើនបើផ្ទៃមេឃស្រឡះល្អ និងគ្មានភ្លៀងកក់ខែ ហើយក៏បានអំពាវដល់អាជ្ញាធរមូលដ្ឋាន សមត្ថកិច្ចគ្រប់ជាន់ថ្នាក់ ជួយបង្កភាពងាយស្រួលដល់ការស្នាក់នៅ ធ្វើដំណើរ និងដឹកជញ្ជូនផលិតផលត្រីរបស់ពលរដ្ឋ កុំឲ្យមានការរាំងស្ទះ។
លោកណៅ ធួក រដ្ឋលេខាធិការក្រសួងកសិកម្ម រុក្ខាប្រមាញ់ និង នេសាទបានប្រាប់ថា ត្រីសម្រាប់ធ្វ្រើហុកផ្អកនៅតាមគន្លងដាយប៉ែកខាងលើដូចជាជួរលេខ១៥ចាប់ផ្តើមត្រូវខ្លះហើយដោយលើកកម្តងបានត្រីពី៥០ទៅ១០០គីក្រាម ក្នុងរយៈពេលប្រមាណជាមួយម៉ោងលើកម្តង៕ ដោយ ៖ បញ្ញាស័ក្តិ