ប្រទេសកូរ៉េខាងជើងនៅថ្ងៃអាទិត្យម្សិលមិញនេះ បានស្នើឲ្យមានការស៊ើបអង្កេតជុំវិញអ្វីដែលខ្លួនហៅថា ជាការវាយប្រហារភេរវកម្មទៅលើស្ថានទូតរបស់ខ្លួនក្នុងទីក្រុងម៉ាទ្រីដ ប្រទេសអេស្ប៉ាញកាលពីខែមុន។
នៅក្នុងសេចក្តីថ្លែងការ ក្រសួងការបរទេសកូរ៉េខាងជើង បានជំរុញឲ្យអាជ្ញាធរអេស្ប៉ាញធ្វើការស៊ើបអង្កេតលើការវាយឆ្មក់ចូលស្ថានទូតរបស់ខ្លួនកាលពីថ្ងៃទី ២២ ខែកុម្ភៈ ដោយខ្លួនអះអាងថា ក្រុមប្រដាប់អាវុធ បានវាយដុំ និងធ្វើទារុណកម្មបុគ្គលិកខ្លួន មុនពេលក្រុមទាំងនោះលួចយកកុំព្យូទ័រទៅ។
ក្រសួងការបរទេសកូរ៉េខាងជើងបន្ថែមថា ខ្លួនបានមើលពាក្យចរចាមអារ៉ាមថា FBI និងក្រុមប្រឆាំងកូរ៉េខាងជើង ជាអ្នកទទួលខុសត្រូវលើការវាយឆ្មក់នោះ ប៉ុន្តែខ្លួនមិនបានដាក់កំហុសលើទីក្រុងវ៉ានស៊ីនតោនទេ។
កូរ៉េខាងជើងបានហៅការលុកលុយចូលខុសច្បាប់ទាំងនោះថា ជាការរំលោភអធិបតេយ្យភាពយ៉ាងធ្ងន់ធ្ងន និងបានស្នើឲ្យអាជ្ញាធរអេស្ប៉ាញចាប់ជនប្រព្រឹត្តទាំងនោះ យកមកកាត់ទោសតាមច្បាប់អន្តរជាតិ។
សូមបញ្ជាក់ថា បន្ទាប់ពីមានការឆ្មក់ចូលស្ថានទូតកូរ៉េខាងជើង មានក្រុមប្រឆាំងកូរ៉េខាងជើងឈ្មោះ Cheollima Civil Defense បានចេញមុខអះអាងថា វាគឺជាទំនួសខុសត្រូវរបស់ពួកគេ ប៉ុន្តែក្រុមសម្ងាត់មួយនេះបានបដិសេធថាវាគឺជាការវាយឆ្មក់ដោយមានប្រដាប់អាវុធ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN