ស្ត្រីជនជាតិវៀតណាម ដែលរងការសង្ស័យថាបានធ្វើឃាតបងប្រុសម្តាយទីទៃរបស់មេដឹកនាំកូរ៉េខាងជើង បានទទួលយកបទចោលប្រកាន់កម្រិតស្រាលនៅថ្ងៃច័ន្ទនេះ ហើយនាងអាចនឹងត្រូវគេដោះលែងឲ្យមានសេរីភាពវិញក្នុងពេលឆាប់ៗ ក្រោយពេលស្ត្រីជនជាតិឥណ្ឌូនេស៊ីម្នាក់ដែលរងការចោទប្រកាន់ដូចគ្នា ត្រូវបានដោះលែងកាលពីខែមុន។
ស្ត្រីវៀតណាមឈ្មោះ Doan Thi Huong បាននិយាយថា នាងពិតជាសប្បាយចិត្តណាស់ ក្រោយពេលព្រះរាជអាជ្ញាប្រាប់ក្រុមការពារក្តីរបស់នាងពីបទចោទប្រកាន់ថ្មី នៅក្នុងតុលាការប្រទេសម៉ាឡេស៊ី។
នាងត្រូវបានចាប់ខ្លួនកាលពីឆ្នាំ ២០១៧ និងរងការចោទប្រកាន់ពីបទឃាកម្មលើរូបលោក គីម ជុងណាម នៅព្រលានយន្តហោះទីក្រុងកូឡាឡាំពូរ។ តាំងពីធ្វើការកាត់ក្តីជាបន្តបន្ទាប់មក ស្ត្រីខាងលើបានបដិសេធទៅនឹងការចោទប្រកាន់ និងបានបញ្ជាក់ថា នឹងត្រូវគេបញ្ចុះបញ្ចូលឲ្យចូលរួមលេងក្នុងកម្មវិធី ដែលនាងគិតថាជាកម្មវិធីកំសាន្តទូរទស្សន៍។
កាលពីខែមុន តុលាការបានបដិសេធទម្លាក់ចោលការចោទប្រកាន់លើនាង ក្រោយពេលបានទម្លាក់ចោលការចោទប្រកាន់លើជនជាប់ចោទជាស្ត្រីឥណ្ឌូនេស៊ីម្នាក់ ដែលជាប់ចោទពីបទធ្វើឃាតដូចគ្នា។
លោក Salim Bashir មេធាវីម្នាក់របស់ស្ត្រីវៀតណាម បានថ្លែងប្រាប់អ្នកសារពត៌មានដូច្នេះថា តុលាការបានចោទប្រកាន់កូនក្តីរបស់គាត់ពីបទបង្ករបួសស្នាមដោយអាវុធគ្រោះថ្នាក់ ជំនួសការចោទប្រកាន់ពីបទធ្វើឃាត។
ការចោទប្រកាន់ពីបទល្មើសថ្មីនេះ អាចនឹងមានទោសច្រើនបំផុតរយៈពេល ១០ឆ្នាំ ប៉ុន្តែមេធាវីបញ្ជាក់ថា នាងទំនងជានឹងទទួលបានការកាត់បន្ថយទោស ហើយនាងទំនងជានឹងអាចចេញពីគុកនៅថ្ងៃនេះផងដែរ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
