កណ្តាល ៖ នគរបាលស្រុកខ្សាច់កណ្ដាល នៅថ្ងៃទី ១ មេសា ២០១៩ បានឲ្យដឹងថា ការស្រាវជ្រាវ និងបង្ក្រាប ការចាប់ខ្លួនតាមដីការបស់សាលាដំបូងខេត្តកណ្ដាល ដោយកម្លាំងអធិការដ្ឋាននគរបាលស្រុក បានសហការ ជាមួយកម្លាំងប៉ុស្តិ៍ព្រែកលួង ករណីការអនុវត្តដីកាបង្គាប់ឲ្យចាប់ខ្លួនបុរសម្នាក់ពីបទប្រើប្រាស់អំពើហិង្សាដោយចេតនាកាលពីឆ្នាំ 2010 របស់តុលាការខេត្តកណ្ដាល នៅថ្ងៃទី១ មេសា ២០១៩ វេលាម៉ោង៩ ចំណុចភូមិព្រែកតាទេព ឃុំព្រែកលួង ស្រុកខ្សាច់កណ្តាល ខេត្តកណ្តាល ។
នគរបាលស្រុកខ្សាច់កណ្តាលបានឲ្យដឹងថា ៖ ជនជាប់ចោទឈ្មោះ យិ វុត្ថា ហៅ អូន វុត្ថា ភេទ ប្រុស អាយុ ៣៣ ឆ្នាំ ជនជាតិ ខ្មែរ មុខរបរ កសិករ ទីលំនៅបច្ចុប្បន្ន ភូមិព្រែកតាទេព ឃុំព្រែកលួង ស្រុកខ្សាច់កណ្ដាល ខេត្តកណ្តាល ត្រូវចាប់ខ្លួនដោយយោងតាមដីកាបង្គាប់ឲ្យចាប់ខ្លួនលេខ៖ ១៤៥ ដកបចខ ចុះថ្ងៃទី ០២ ខែ ឧសភា ឆ្នាំ ២០១២ របស់លោក ហុក វ៉ាន់ធីណា ចៅក្រមជំនុំជម្រៈ នៃសាលាដំបូងខេត្តកណ្តាល ពីបទ៖ បង្ករបួសស្នាមដោយចេតនា ដែលប្រព្រឹត្តនៅភូមិព្រែកតាទេព ឃុំព្រែកលួង ស្រុកខ្សាច់កណ្ដាល ខេត្តកណ្តាល កាលពីថ្ងៃទី ៤ ខែ មិថុនា ឆ្នាំ ២០១០។
ករណីនេះសមត្ថកិច្ច បន្តចាត់ការតាមនីតិវិធី ៕ ដោយ ៖ កូឡាប
