គ្រូម្នាក់នៅសាលាមត្តេយ្យក្នុងប្រទេសចិន ត្រូវបានប៉ូលីសចាប់ខ្លួនដោយសង្ស័យថាបានបំពុលសិស្សចំនួន ២៣នាក់។ នេះបើតាមការបញ្ជាក់របស់មន្ត្រីចិន។
កូនសិស្សទាំងអស់ត្រូវបានគេដឹកទៅកាន់មន្ទីរពេទ្យយ៉ាងប្រញ៉ាប់ ក្រោយពេលពួកគេញុាំបបរ នៅសាលាមត្តេយ្យមួយ ក្នុងទីក្រុង Jiaozuo នៃខេត្ត Henan។
ការស៊ើបអង្កេតបឋមបានបង្ហាញថា អាហារដែលកូនសិស្សទាងនោះញ៉ាំមានផ្ទុកសារធាតុសូត្យូមនីត្រាយត៍យ៉ាងច្រើន។
ប៉ូលីសបញ្ជាក់ថា មូលហេតុបណ្តាលឲ្យមានការបំពុលកូនសិស្សបែបនេះ មិនទាន់ច្បាស់នៅឡើយទេ។
ប៉ុន្តែប្រព័ន្ធផ្សព្វផ្សាយចិនបានធ្វើការដកស្រងប្រភពពីប៉ូលីសថា គ្រូនោះចង់ធ្វើការសងសឹកលើអ្នករួមការងារម្នាក់។
កូនសិស្សចាប់ផ្តើមក្អួត និងសន្លប់ ក្រោយពេលញុាំអាហារពេលព្រឹកពួកគេកាលពីថ្ងៃពុធមុន ប៉ុន្តែប៉ូលីសទើបតែធ្វើសេចក្តីរាយការណ៍ពីហេតុការណ៍នោះនៅថ្ងៃច័ន្ទនេះ។
កូនសិស្សម្នាក់កំពុងស្ថិតក្នុងស្ថានភាពធ្ងន់ធ្ងរ ខណៈ ៧នាក់ទៀតកំពុងទទួលការព្យាបាលនៅមន្ទីរពេទ្យ។ សិស្ស ១៥នាក់ ត្រូវបានពេទ្យអនុញ្ញាតិឲ្យត្រឡប់ទៅផ្ទះវិញ បន្ទាប់ពីអាការៈបានធូរស្រាល។ នេះបើតាមការចុះផ្សាយរបស់ Xinhua។
សូមបញ្ជាក់ថាសារធាតុសូត្យូមនីត្រាយត៍ (Sodium nitrite) ត្រូវបានគេប្រើប្រាស់សម្រាប់បន្ថែមក្នុងអាហារ ដើម្បីធ្វើឲ្យអាហារកាន់តែមានរសជាតិ និងរក្សាគុណភាពរបស់វា ប៉ុន្តែវាអាចនឹងធ្វើឲ្យអាហារពុលបាន បើមានសារធាតុនេះច្រើនលើសកម្រិត៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC