កំពង់ចាម ៖ លោកគួច ចំរើន អភិបាលខេត្តកំពង់ចាម បានថ្លែងតាមរយៈហ្វេសប៊ុកនៅថ្ងៃទី៣មេសានេះថា ឃោរឃៅខ្លាំងណាស់ កាត់ក្បាលមនុស្ស ២នាក់ យកក្បាលទៅបាត់ មិនទាន់ដឹងថារឿងអ្វី ។ មីងម្នាក់ឈ្មោះ ពូ អូន អាយុ ៦៥ឆ្នាំ និងចៅស្រីគាត់ម្នាក់ឈ្មោះ ខេង សាវឿន អាយុ ៦ឆ្នាំ នៅភូមិ ទួលថ្ម ឃុំថ្មពូន ស្រុកព្រៃឈរ ខេត្តកំពង់ចាម ត្រូវឃាតករ សំលាប់កាត់ក្បាលចោលដងខ្លួននៅក្រោយផ្ទះ ចំងាយ ៣៥០ម៉ែត្រ កាលពីយប់ថ្ងៃ ០២-០៤-១៩។
សមត្ថកិច្ចមូលដ្ឋានបានឲ្យដឹងថា នៅវេលាថ្ងៃត្រង់ថ្ងៃទី០៣ ខែមេសា ឆ្នាំ២០១៩នេះ ប៉ុស្តិ៍រដ្ឋបាលថ្មពូន បានទទួលព័ត៌មានពីឈ្មោះ ដើង ថន ភេទស្រី អាយុ៣៥ឆ្នាំ នៅភូមិត្រពាំងបឹង ឃុំថ្មពូនថា បានបាត់ម្តាយឈ្មោះ ពូ អូន អាយុ៦៥ឆ្នាំ និងក្មួយស្រីបង្កើតឈ្មោះ ខេង សាវឿន អាយុ៦ឆ្នាំ បានបាត់ចេញពីផ្ទះ នៅពេលព្រឹកមិនដឹងចេញពីកន្លែងណា ហើយសំណូមពរឲ្យសមត្ថកិច្ចជួយធ្វើការស្រាវជ្រាវ។
បន្ទាប់ពីទទួលបណ្ដឹងផ្ទាល់មាត់ និងសំណូមពររបស់គាត់ភ្លាម កម្លាំងនគរបាលប៉ុស្តិ៍ថ្មពូន បានសហការជាមួយក្រុមគ្រួសារជនរងគ្រោះ ធ្វើការស្រាវជ្រាវរុករក ឃើញសាកសពជនរងគ្រោះទាំងពីរនាក់ នៅក្នុងព្រៃខាងត្បូងផ្ទះជនរងគ្រោះ ចម្ងាយប្រហែល៣៥០ម៉ែត្រ ដោយសាកសពនៅបែកពីគ្នាគ្មានក្បាលទាំង។
សមត្ថកិច្ចបានបញ្ជាក់ទៀតថា ករណីខាងលើនេះ ជនសង្ស័យមិនទាន់កំណត់អត្តសញ្ញាណបានឡើយទេ ខណៈកម្លាំងនគរបាលជំនាញ កំពុងបន្តធ្វើការស៊ើបអង្កេតស្រាវជ្រាវ ដើម្បីចាត់ការតាមនីតិវិធី៕ ដោយ៖កូឡាប
