ប្រទេសអូស្ត្រាលីបានឲ្យដឹងថា ខ្លួននឹងឈប់ធ្វើការវាយប្រហារតាមដែនអាកាសប្រឆាំងនឹង ក្រុមរដ្ឋអ៊ីស្លាម (IS) ក្នុងប្រទេសស៊ីរី និងអ៊ឺរ៉ាក់ ហើយនឹងធ្វើការហៅយន្តហោះចំបាំងឪម៉ាល់ (Hornet jet) ចំនួន ៦គ្រឿងឲ្យត្រឡប់ទៅប្រទេសវិញ។ នេះបើតាមការចេញផ្សាយរបស់ BBC នៅថ្ងៃសុក្រនេះ។
ទោះយ៉ាងណាក៏ដោយ អូស្ត្រាលីបានឲ្យដឹងថា យន្តចាក់ប្រេង និងស៊ើបការណ៏នឹងបន្តមានវត្តមាននៅក្នុងប្រទេសអ៊ឺរ៉ាក់ តាមសំណើររបស់ប្រទេសនេះ។
ប្រទេសអូស្ត្រាលីបានធ្វើការវាយប្រហារតាមដែនអាកាសប្រឆាំងនឹងក្រុម IS អស់រយៈពេលជាង ២ឆ្នាំមកហើយ ដែលប្រតិបត្តិការនោះគឺជាផ្នែកមួយនៃកងកំលាំងចំរុះអន្តរជាតិប្រឆាំងនឹងក្រុមភេវរករអ៊ីស្លាម។
រដ្ឋមន្ត្រីក្រសួងការពារជាតិអូស្ត្រាលី អ្នកស្រី Marise Payne បាននិយាយថា ការប្រកាសពីការបញ្ឍប់ប្រតិបត្តិតាមដែនអាកាសរបស់អូស្ត្រាលី គឺដោយសារតែប្រទេសអ៊ឺរ៉ាក់ទើបតែប្រកាសពីការទទួលបានជ័យជំនះលើក្រុម IS កាលពីពេលថ្មីៗនេះ។
អ្នកស្រីបន្តថា ប្រទេសអ៊ឺរ៉ាក់ និងសម្ព័ន្ធមិត្តដទៃទៀតកំពុងពិភាក្សាគ្នាពីការសម្រេចចិត្តនេះ។
ប្រទេសអូស្ត្រាលីបានដាក់ពង្រាយកងកំលាំងចំនួន ៧៨០នាក់ដើម្បីចូលរួមប្រយុទ្ធប្រឆាំងនឹងក្រុម IS។ កងកំលាំងចំរុះដឹកនាំដោយសហរដ្ឋអាមេរិច៕ សុភ័ក្ត្រ