ខេត្តស្វាយរៀង ៖ ចំការកូនប្រេងខ្យល់របស់លោកឧកញ៉ា លី ប៉ោយូ ចំនួនជាង៦ហិកតាស្ថិតនៅភូមិសាមគ្គីសង្កាត់ច្រកម្ទេសក្រុងបាវិតត្រូវបានអគ្គិភ័យឆាប់ឆេះបណ្តាលឱ្យខូចខាតទាំងស្រុងកាលពីវេលាម៉ោង១២ថ្ងៃត្រង់ថ្ងៃទី៥ ខែមេសា ឆ្នាំ ២០១៩ ប៉ុន្តែពុំបានបណ្តាលឱ្យ មានគ្រោះថ្នាក់ដល់អាយុជីវិតរឺក៏ខូចខាតដល់ផ្ទះសំបែងរបស់ប្រជាពលរដ្ឋនោះទេ។
លោកហួត សាម៉ៃ ចៅសង្កាត់ច្រកម្ទេសក្រុងបាវិតបានអោយអ្នកសារព័ត៌មានដឹងតាមទូរសព្ទ័នៅរសៀលថ្ងៃទី៥ ខែមេសា ឆ្នាំ២០១៩នេះ ថាអគ្គិភ័យបានឆេះចំការកូនប្រេងខ្យល់ប្រមាណជិត៧ហិកតា ស្ថិតក្នុងភូមិសាមគ្គី សង្កាត់ច្រកម្ទេស ក្រុងបាវិត ខេត្តស្វាយរៀងបានរលត់ទាំងស្រុងហើយនៅម៉ោង១៥រសៀលនេះ ហើយករណីឆេះនេះមិនទាន់ដឹងច្បាស់ថាបណ្តាលមកពីអ្វីអោយពិតប្រាដកនោះទេលោកកំពុងអោយប៉ូលិសរដ្ឋបាលចុះស្រាវជ្រាវ។
តាមប្រជាពលរដ្ឋនៅភូមិសាមគ្គីសង្កាត់ច្រកម្ទេសបានឲ្យដឹងថា ចំការកូនប្រុងខ្យល់ដែលឆេះនេះជាកម្មិសិទ្ធិរបស់ឧកញ៉ា លី ប៉ោយូ ដ៏ល្បីឈ្មោះដែលមានដីនិងផ្ទះច្រើននៅក្រុងបាវិតហើយអ្វីដែលមានការព្រួយបារម្ភនោះ គឺអគ្គិភ័យដ៏ធំមានចំង៉ាយប្រមាណ៥០០ម៉ែត្រប៉ុណ្ណោះដល់ផ្ទះប្រជាពលរដ្ឋដោយសារមានកូនប្រឡាយមួយដែលកាត់មាត់ភ្លើងកុំអីច្បាស់ជាឆេះរាលដាលដល់ផ្ទះពលរដ្ឋមិនខានឡើយ។
ទោះបីយ៉ាងណាគេសង្កេតឃើញមានវត្តមានសមត្ថកិច្ច៥ទៅ៦នាក់បានមកជួយពន្លត់ផងដែរដោយបានយកមែកឈើវាយភ្លើងកុំអោយរាលដាលរីឯរថយន្តពន្លត់អគ្គីភ័យមិនអាចចូលទៅដល់ទីតាំងដែលឆេះនោះបានទេត្រឹមចតនៅលើថ្នល់ជាតិតែប៉ុណ្ណោះពីព្រោះពុំមានផ្លូវចូលទៅដល់ ៕ ដោយ ៖ វ៉ៃកូ