ភ្នំពេញ ៖ ទេសាភិបាល ធនាគារជាតិនៃកម្ពុជា បានលើកឡើងថាវិស័យធនាគារកម្ពុជា ត្រូវបានទទួលស្គាល់ថា មានលក្ខណៈបើកទូលាយ ហើយមានសមាហរណកម្មខ្ពស់ទៅក្នុងតំបន់ ដោយបច្ចុប្បន្ន គ្រឹះស្ថានធនាគារនិងហិរញ្ញវត្ថុមកពីប្រទេសក្នុងតំបន់ភាគច្រើនមានវត្តមាននៅកម្ពុជា។
នាថ្ងៃសុក្រ ១កើត ខែចេត្រ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៥ ខែមេសា ឆ្នាំ២០១៩ លោក ជា ចាន់តូ ទេសាភិបាល ធនាគារជាតិនៃកម្ពុជា បានអញ្ជើញចូលរួមកិច្ចប្រជុំថ្នាក់ទេសាភិបាលធនាគារកណ្តាលអាស៊ាន លើកទី១៥ និងកិច្ចប្រជុំថ្នាក់រដ្ឋមន្ត្រីហិរញ្ញវត្ថុនិងទេសាភិបាលធនាគារកណ្តាលអាស៊ាន លើកទី៥ នៅខេត្តឈៀងរ៉ៃ ប្រទេសថៃ។ កិច្ចប្រជុំជាន់ខ្ពស់កម្រិតតំបន់នៃវិស័យហិរញ្ញវត្ថុនេះ មានគោលបំណងពិនិត្យនិងពិភាក្សាលើវឌ្ឍនភាពសមាហរណកម្ម និងកិច្ចសហប្រតិបត្តិការក្នុងវិស័យហិរញ្ញវត្ថុអាស៊ាន ដើម្បីគាំទ្រកំណើនសេដ្ឋកិច្ច និងពង្រឹងស្ថិរភាពហិរញ្ញវត្ថុក្នុងតំបន់ ស្របតាមគោលដៅនៃផែនការសហគមន៍សេដ្ឋកិច្ចអាស៊ាន ឆ្នាំ២០២៥។
ធនាគារជាតិនៃកម្ពុជា ដែលបានដើរតួនាទីគន្លឹះមួយក្នុងសមាហរណកម្មហិរញ្ញវត្ថុអាស៊ាន បានចូលរួមពង្រឹងសមាហរណកម្មវិស័យធនាគារ និងការតភ្ជាប់ប្រព័ន្ធទូទាត់ក្នុងតំបន់។ វិស័យធនាគារកម្ពុជា ត្រូវបានទទួលស្គាល់ថា មានលក្ខណៈបើកទូលាយ ហើយមានសមាហរណកម្មខ្ពស់ទៅក្នុងតំបន់ ដោយបច្ចុប្បន្ន គ្រឹះស្ថានធនាគារនិងហិរញ្ញវត្ថុមកពីប្រទេសក្នុងតំបន់ភាគច្រើនមានវត្តមាននៅកម្ពុជា។ គ្រឹះស្ថានធនាគារនិងហិរញ្ញវត្ថុទាំងនេះ បាននាំមកនូវមូលធននិងបច្ចេកវិទ្យា ដែលផ្តល់បរិយាកាសអំណោយផលដល់ការអភិវឌ្ឍវិស័យធនាគារនៅកម្ពុជា។ ម្យ៉ាងទៀត កម្ពុជា បានតភ្ជាប់ប្រព័ន្ធទូទាត់របស់ខ្លួនជាមួយប្រទេសក្នុងតំបន់និងពិភពលោក។ បច្ចុប្បន្ន ធនាគារជាតិនៃកម្ពុជា កំពុងអភិវឌ្ឍប្រព័ន្ធទូទាត់តាមរយៈបច្ចេកវិទ្យាទំនើប រួមមានប្រព័ន្ធ QR Code ជាមួយប្រទេសក្នុងតំបន់ ដូចជាប្រទេសថៃ ជាដើម។ ការទូទាត់តាមប្រព័ន្ធ QR Code នឹងរួមចំណែកលើកកម្ពស់ប្រសិទ្ធភាពទូទាត់ ឱ្យមានសុវត្ថិភាព និងចំណាយទាបសមរម្យ។
នៅឆ្នាំ២០១៩នេះ ប្រទេសថៃបានជ្រើសរើសប្រធានបទសំខាន់ ស្តីពី ការជំរុញភាពជាដៃគូសម្រាប់ចីរភាព (Advancing Partnership for Sustainability) ក្នុងគោលបំណងផ្តោតការយកចិត្តទុកដាក់ទៅលើការតភ្ជាប់ចីរភាព និងភាពធន់ ដែលជាកត្តាចម្បងសម្រាប់ពង្រឹងកិច្ចសហប្រតិបត្តិការហិរញ្ញវត្ថុ។
ជារួម អង្គប្រជុំបានអបអរសាទរចំពោះវឌ្ឍនភាពក្នុងការធ្វើសមាហរណកម្មហិរញ្ញវត្ថុអាស៊ានចាប់តាំងពីកិច្ចប្រជុំប្រចាំឆ្នាំកាលពីឆ្នាំមុន នៅប្រទេសសិង្ហបូរី ជាពិសេស លើការបង្កើនសេរីភាវូបនីយកម្មសេវាហិរញ្ញវត្ថុ, ការសម្រួលការវិនិយោគនិងពាណិជ្ជកម្ម, ការតភ្ជាប់សេវា, ការទូទាត់និងហិរញ្ញប្បទាន, ការផ្តល់ហិរញ្ញប្បទានដល់ហេដ្ឋារចនាសម្ព័ន្ធ, ការផ្តល់ហិរញ្ញវត្ថុជាមួយការការពារបរិស្ថាន, ការលើកកម្ពស់បរិយាប័ន្នហិរញ្ញវត្ថុ, ការផ្តល់ហិរញ្ញប្បទានគ្រប់គ្រងហានិភ័យគ្រោះមហន្តរាយ, ការពង្រឹងភាពធន់ទៅនឹងឧក្រិដ្ឋកម្មបច្ចេកវិទ្យា និងការគ្រប់គ្រងទ្រព្យសកម្មឌីជីថល៕ ដោយ៖បញ្ញាស័ក្តិ
