ខេត្តស្វាយរៀង ៖ រថយន្តដឹកដែកសសៃមួយគ្រឿងដែលតៃកុងងងុយដេកបានបើកបុកចូលរោងលក់លក់ដូរប៉ើងអស់តែសំណាងល្អគ្មានបង្កគ្រោះថ្នាក់ដល់មនុស្សនោះទេគ្រាន់តែបង្កការខូចខាតរបស់របរប៉ុណ្ណោះ។ករណីនេះបានកើតឡើងកាលវេលាម៉ោង ០៥និង៣០នាទីថ្ងៃទី០៧ ខែមេសា ឆ្នាំ២០១៩ លើផ្លូវជាតិលេខ០១ ចន្លោះគីឡូម៉ែត្រលេខ១៣៨-១៣៩ ត្រង់ចំណុចក្នុងភូមិលៀប ឃុំកណ្តៀងរាយ ស្រុកស្វាយទាប ខេត្តស្វាយរៀង។
យោងតាមសមត្ថកិច្ចបានអោយដឹងថា៖រថយន្ត០១គ្រឿងម៉ាកហ៊ីយ៉ាន់ដាយ ពណ៌ស-ខៀវ ពាក់ស្លាកលេខប.មានជ័យ ៣A-០០៣១ បើកបរដោយឈ្មោះ សរ ចាន់សុភក្រ័ ភេទប្រុស អាយុ ៣២ឆ្នាំ មុខរបរបើកបររថយន្ត រស់នៅភូមិត្នោតជ្រំ៤ សង្កាត់បឹងទំពុន ខណ្ឌមានជ័យ រាជធានីភ្នំពេញ បើកបរពីលិចទៅកើតមកដល់ចំណុចកើតហេតុខាងលើបានងោកមួយភាំង រួចបានជ្រុលចង្កូតបុកចូលរោងខាងមុខផ្ទះតែម្តង ប៉ុន្តែសំណាងល្អពុំមានបង្កគ្រោះថ្នាក់ដល់ប្រជាពលរដ្ឋនោះទេ។
ប្រភពបានបន្តទៀតថា ៖ ផ្ទះដែលរងគ្រោះនោះម្ចាស់មានឈ្មោះ ពុត បារាំង ភេទប្រុស អាយុ ៣៣ឆ្នាំ រស់នៅភូមិ លៀប ឃុំ កណ្តៀងរាយ ស្រុក ស្វាយទាប ខេត្តស្វាយរៀង មានប្រពន្ធឈ្មោះងួន សុខេង អាយុ២៤ឆ្នាំ មានកូន០២នាក់ ទី១ឈ្មោះគីម លីហ្សា ភេទស្រីអាយុ០២ឆ្នាំ កូនទី២ឈ្មោះគីម សំរឹទ្ធ ភេទប្រុសអាយុ០២ខែ ដែលកំពុងដេកលង់លក់ក្នុងបន្ទប់ខាង តែមិនបណ្តាលឲ្យមានមនុស្សរងរបួសទេ គ្រាន់តែខូចខាតរោងដែកប្រក់សង្ហ័សីទាំងស្រុងទំហំទទឹង៦,៥០ម៉ែត្រxបណ្តោយ ១១,៦០ម៉ែត្រ និងសម្ភារៈមួយចំនួនទៀត ៖
-ស្រាបៀរប្រហែល ២០០កេស
-ភេសជ្ជៈ-ទឹកសុទ្ធប្រហែល៤០០កេស
-ទូរទឹកកក០២
-ទូរកញ្ចក់(ដូរលុយ)០១
-អីវ៉ាន់ចាប់ហួយមួយចំនួន
ក្រោយកើតហេតុអ្នកបើកបររថយន្តត្រូវសមត្ថកិច្ចឃាត់ខ្លួននាំយកមកអធិការដ្ឋាន ដើម្បីបំពេញសំណុំរឿងតាមនីតិវិធីច្បាប់ រីឯមធ្យោបាយបាយនៅកន្លែងកើតហេតុរងចាំរថយន្តមកអូសទៅរក្សាទុកនៅអធិការដ្ឋាន។ មូលហេតុ ៖ អ្នកបើកបររថយន្តងងុយដេក បើកធ្លាក់ផ្លូវ ៕ ដោយ ៖ វ៉ៃកូ
