នៅថ្ងៃទី០៩ ខែមេសា ឆ្នាំ២០១៩គណៈកម្មាធិការជាតិសុវត្ថិភាពចរាចរណ៍ផ្លូវគោក បើកកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំត្រីមាសទី១ ឆ្នាំ២០១៩ ក្រោមអធិបតីភាព សម្តេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក ដោយមានការចូលរួមពីមន្ត្រីជាន់ខ្ពស់របស់ក្រសួង សមាជិកសមាជិកាគណៈកម្មាធិការ និងស្ថាប័នពាក់ព័ន្ធផងដែរ។
យោងតាមរបាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោកឱ្យដឹងថា៖ ករណីគ្រោះថ្នាក់ចរាចរណ៍នៅក្នុងត្រីមាសទី១ ឆ្នាំ២០១៩ បានកើតឡើងចំនួន ១.០៧៦លើក មានការកើនឡើងចំនួន ២៥៧ករណី ស្មើនឹង៣១% បើប្រៀបធៀបនឹងត្រីមាសទី១ ឆ្នាំ២០១៨កន្លងទៅ ស្លាប់កើនឡើង ៣៣នាក់ ស្មើនឹង៧% និងរបួសកើន ៣៥៨នាក់ ស្នើនឹង ២៩%។ ករណីគ្រោះថ្នាក់ចរាចរណ៍កើនឡើងនេះ បង្កដោយការបើកបរលើសល្បឿនកំណត់ មិនគោរពសិទ្ធិអាទិភាព មិនប្រកាន់ស្តាំ វ៉ាជែង បត់ក្នុងស្ថានភាពគ្រោះថ្នាក់ ការបើកបរក្នុងពេលស្រវឹង ងងុយ កត្តាយានយន្ត និងការមិនគោរពច្បាប់ចរាចរណ៍ផងដែរ។
ថ្លែងនាឱកាសនោះ លោក ទេសរដ្ឋមន្ត្រី ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធានអចិន្ត្រៃយ៍ នៃ1គណៈកម្មាធិការជាតិសុវត្ថិភាពចរាចរណ៍ផ្លូវគោក បានគូសបញ្ជាក់ថា៖ ក្រសួងសាធារណការ និងដឹកជញ្ជូន បានខិតខំប្រឹងប្រែងរិះរកគ្រប់មធ្យោបាយ ដើម្បីកាត់បន្ថយគ្រោះថ្នាក់ចរាចរណ៍ ជាពិសេស គ្រោះថ្នាក់ចរាចរណ៍ដែលបណ្ដាលឱ្យស្លាប់ របួស និងការបាត់បង់ទ្រព្យសម្បត្តិ តាមរយៈការតាក់តែង លិខិតបទដ្ឋានគតិយុត្ត ការជួសជុលថែទាំផ្លូវ បំពាក់ផ្លាកសញ្ញា ភ្លើងសញ្ញា ចែកមួកសុវត្ថិភាព និងរឹតបន្តឹងការដឹកជញ្ជូនលើសទម្ងន់កម្រិតកំណត់ និងការកែច្នៃយានយន្តខុសលក្ខណៈបច្ចេកទេស។
ជាមួយគ្នានេះផងដែរ លោក ទេសរដ្ឋមន្ត្រី បានស្នើឱ្យបង្កើនកិច្ចសហការ ពង្រឹងការអនុវត្តច្បាប់ ធ្វើយុទ្ធនាការផ្សព្វផ្សាយជាសាធារណៈអំពីច្បាប់ចរាចរណ៍ផ្លូវគោក ការផ្សព្វផ្សាយវីដេអូអប់រំតាមទូរទស្សន៍ពីផលវិបាក និងការខាតបង់ដោយសារគ្រោះថ្នាក់ចរាចរណ៍ យុទ្ធនាការចែកមួកសុវត្ថិភាព ក៏ដូចជាស្ទីគ័រ ចំណាំងផ្លាត និងយុទ្ធនាការផ្សេងៗថែមទៀត ដើម្បីចូលរួមកាត់បន្ថយគ្រោះថ្នាក់ចរាចរណ៍ ជាពិសេសក្នុងឱកាសបុណ្យចូលឆ្នាំថ្មី នាពេលខាងមុខនេះ។
លោក ទេសរដ្ឋមន្ត្រី ក៏បានស្នើឱ្យក្រុមហ៊ុនឯកជន ក៏ដូចជារោងចក្រនានានៅកម្ពុជា ជួយរៀបចំកម្មវិធីបណ្តុះបណ្តាល និងផ្សព្វផ្សាយច្បាប់ចរាចរណ៍ផ្លូវគោកដល់បុគ្គលិក កម្មករ និយោជិត និងអ្នកបើកបរ រថយន្តរបស់ខ្លួន និងបានស្នើឱ្យគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បង្កើតក្រុមការងារប្រចាំការមួយសហការជាមួយកំពង់ផែ និងក្រុមហ៊ុនដឹកជញ្ជូនអ្នកដំណើរ ដើម្បីត្រួតពិនិត្យយានយន្តកែច្នៃខុសលក្ខណៈបច្ចេកទេស និងអ្នកបើកបរយានយន្តធុនធ្ងន់គ្មានបណ្ណបើកបរ មុនពេលចេញ-ចូលកំពង់ផែ និងមុនពេលចេញដំណើរដឹកអ្នកដំណើរ ដើម្បីចូលរួមកាត់បន្ថយគ្រោះថ្នាក់ចរាចរណ៍ និងការដឹកជញ្ជូនលើសទម្ងន់កម្រិតកំណត់។
លោក ទេសរដ្ឋមន្ត្រី ក៏បានគូសបញ្ជាក់ផងដែរអំពីអត្ថប្រយោជន៍នៃការដាក់ឱ្យប្រើប្រាស់កម្មវិធីថែទាំផ្លូវ (ROAD CARE Mobile App) ដើម្បីកាត់បន្ថយគ្រោះថ្នាក់ចរាចរណ៍ដែលកើតឡើងដោយសារជង្ហុក សំបុកមាន់ និងផ្លូវខូច ព្រមទាំងជួយឱ្យប្រជាពលរដ្ឋធ្វើដំណើរលើប្រព័ន្ធបណ្តាញផ្លូវប្រកបដោយ សុវត្ថិភាព។ កម្មវិធីនេះអនុញ្ញាតឱ្យប្រជាពលរដ្ឋរាយការណ៍អំពីផ្លូវខូច និងផ្លូវជង្ហុកសំបុកមាន់ទៅកាន់ក្រុមការងារមានសមត្ថកិច្ចដើម្បីចុះមកជួសជុលបានទាន់ពេលវេលា។
នៅក្នុងសន្ទរកថាបិទនាឱកាសនោះ សម្ដេចក្រឡាហោមឧបនាយករដ្ឋមន្ត្រី បានស្នើឱ្យយន្តការដឹកនាំទាំងថ្នាក់ជាតិ និងថ្នាក់ក្រោមជាតិបន្តជំរុញអនុវត្តតាមទិសដៅដែលបានដាក់ចេញ ការពង្រឹងយន្តការផ្សព្វផ្សាយ និងរឹតបន្តឹងការអនុវត្តច្បាប់ចរាចរណ៍ផ្លូវគោក និងលិខិតបទដ្ឋានគតិយុត្តជាធរមាន កែលំអយន្តការដឹកនាំ មន្ដ្រីអនុវត្តច្បាប់ និងរបៀបរបបការងារឱ្យមានប្រសិទ្ធភាព កំណត់គោលដៅជាអាទិភាពក្នុងការទប់ស្កាត់គ្រោះថ្នាក់ចរាចរណ៍ ខិតខំដឹកនាំរៀបចំការផ្តល់សេវាសាធារណៈជូនប្រជាពលរដ្ឋឱ្យកាន់តែឆាប់រហ័ស និងមានតម្លាភាព។
ជាទីបញ្ចប់ សម្តេចក្រឡាហោមឧបនាយករដ្ឋមន្ត្រី បានថ្លែងការកោតសរសើរចំពោះកិច្ចខិតខំប្រឹងប្រែងរបស់មន្ត្រីរាជការ ថ្នាក់ដឹកនាំក្រសួងសាធារណការ និងដឹកជញ្ជូន និងសមាជិកសមាជិកាគណៈកម្មាធិការសុត្ថិភាពចរាចរណ៍ផ្លូវគោក ដែលបានបំពេញការងារប្រកបដោយជោគជ័យកន្លងមក និងបានអំពាវនាវសូមឱ្យប្រជាពលរដ្ឋទាំងអស់ចូលរួមគោរពច្បាប់ចរាចរណ៍ឱ្យបានម៉ឺងម៉ាត ជាពិសេសនៅក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ នាពេលខាងមុខនេះ ដើម្បីជៀសវាងគ្រោះថ្នាក់ចរាចរណ៍៕ ដោយ៖កូឡាប
