រាជធានីភ្នំពេញ ៖ ស្ត្រីម្នាក់ កំពុងជិះម៉ូតូ ត្រូវចោរឆក់កាបូបបានសម្រេច បណ្ដាលឲ្យស្ត្រីរងគ្រោះដួលបោកក្បាលនឹងថ្នល់ ដេកក្នុងថ្លុកឈាម រងរបួសធ្ងន់ធ្ងន់។ បន្ទាប់ពីធ្វើសកម្មភាពឆក់បានសម្រេចហើយ ជនសង្ស័យម្នាក់ បានម៉ូតូ រត់គេចខ្លួនបាត់ស្រមោល ដោយមិនរំខានសមត្ថកិច្ចគោលដៅតាមដងផ្លូវនោះឡើយ ដែលហេតុការណ៍នេះកើតឡើងនៅវេលាម៉ោង ៦ព្រឹក ថ្ងៃទី ១០ ខែមេសា ឆ្នាំ ២០១៩ ស្ថិតនៅតាមបណ្តោយផ្លូវព្រះមុនីរ៉េត សង្កាត់បឹងសាឡាង ខណ្ឌទួលគោក រាជធានីភ្នំពេញ ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញ ស្ត្រីរងគ្រោះ ជិះម៉ូតូឌុប១គ្រឿង ធ្វេីដំណេីរតាមបណ្តោយផ្លូវព្រះមុនីរ៉េត ក្នុងទិសដៅពីកើតមកលិច ខណ:កំពុងធ្វេីដំណេីរ ស្រាប់តែត្រូវជនសង្ស័យម្នាក់ ជិះម៉ូតូម៉ាក ហុងដាឌ្រីមសេ១២៥ មិនចាំស្លាកលេខ ១គ្រឿង ក្នុងល្បឿនយ៉ាងលឿនតែម្នាក់ឯង រួចឆក់យកកាបូបរបស់ស្ត្រីរងគ្រោះ បានសម្រេច បណ្តាលអោយស្ត្រីរងគ្រោះ ដួលបោកក្បាលនឹងថ្នល់ ដេកក្នុងថ្លុកឈាម ហើយត្រូវបានរថយន្តសាមុយដឹកបញ្ជូនទៅមន្ទីរពេទ្យភ្លាមៗ។
សូមបញ្ជាក់ថា មួយរយៈចុងក្រោយនេះ នៅរាជធានីភ្នំពេញ មានចោរឆក់កើតឡើងយ៉ាងគគ្រឹកគគ្រេង ហើយសមត្ថកច្ចមិនដែលបង្ក្រាបបាននោះទេ ដោយយូរៗ ឃើញបង្ក្រាបបានចោរក្នុងករណីតិចតួច។ ហើយជាពិសេសនោះ បណ្ដាលឱ្យជនរងគ្រោះជាច្រើននាក់ រងរបួសធ្ងន់រលាត់ដៃរលាត់ជើងបែកក្បាល និងធ្វើឲ្យអ្នកខ្លះមួយចំនួនទៀត ឈានដល់ស្លាប់ក៏មានដែរ នៅពេលដែលចោររកលុយចូលឆ្នាំថ្មីនេះ។
ពលរដ្ឋរងគ្រោះមួយចំនួន បានថ្លែងប្រាប់អ្នកសារព័ត៌មានថា ពួកគាត់ត្រូវបានចោរឆក់បាត់កាបូប និងទ្រព្យសមត្តិក្នុងកាបូបនោះជាច្រើន ហើយបានទៅដាក់ពាក្យបណ្ដឹងនៅប៉ុស្ដិ៍នគរបាលប៉ុន្តែដំណឹងបានស្ងាត់ឈឹង ពុំដែលឃើញនគរបាលប៉ុស្តិ៍មូលដ្ឋានចាប់បានចោរនោះទេ។ សំណូមពរដល់បងប្អូនប្រជាពលរដ្ឋជាពិសេសអ្នកធ្វើដំណើរតាមដងផ្លូវ ទាំងអស់ មានការប្រុងប្រយ័ត្នខ្ពស់ ព្រោះតែជិតដល់ឱកាសបុណ្យប្រពៃណីខ្មែរ ដូចនេះ ក្រុមចោរឆក់ លួច ប្លន់ បានចេញមកធ្វេីសកម្មភាពហើយសូមពេលធ្វេីដំណេីរទៅណាមកណា ប្រយ័ត្នឲ្យ បានលេីសមុន កុំឲ្យ ជនសង្ស័យមានឱកាសឲ្យ សោះ ៕ ដោយ៖បញ្ញាស័ក្តិ