ភ្នំពេញ៖ នៅក្នុងកិច្ចប្រជុំគណៈរដ្ឋមន្ត្រី នាថ្ងៃទី២២ខែធ្នូនេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានក្រើនរំលឹកដល់ក្រសួងការងារ និងបណ្តុះបណ្តាលវិជ្ជាជីវៈ បញ្ជូនសាច់ប្រាក់ទៅឲ្យបេឡាជាតិសន្តិសុខសង្គម សម្រាប់ការអនុវត្តការផ្តល់ប្រាក់ឧបត្ថម្ភបន្ថែមដល់កម្មការិនី មន្ត្រីរាជការស៊ីវិល កងកម្លាំងប្រដាប់អាវុធ ដែលឆ្លងទន្លេ ចាប់ពីម៉ោងសូន្យខែមករាឆ្នាំ២០១៨។
សម្តេចតេជោ ក៏បានប្រកាសក្រុមការងារដើម្បីរៀបចំបង្កើតធនាគារមួយនៅពេលឆាប់ៗខាងមុខនេះ ដើម្បីគាំទ្រដល់សហគ្រាសធុនតូច និងមធ្យម ដើម្បីរួមចំណែកក្នុងការអនុវត្តគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ ឲ្យកាន់តែមានប្រសិទ្ធភាពថែមទៀត។
សម្តេចនាយករដ្ឋមន្ត្រី បានមានប្រសាសន៍ណែនាំ និងជំរុញថ្នាក់ដឹកនាំ ក្រសួងស្ថាប័នថ្នាក់ជាតិ និងអាជ្ញាធរថ្នាក់ក្រោមជាតិ ដាច់ខាតបន្ត និងខិតខំអនុវត្តកម្មវិធីកំណែទម្រង់ នៅចុងអាណត្តិទី៥ នៃរដ្ឋសភារបស់រាជរដ្ឋាភិបាល តាមរយៈទិសស្លោក “ឆ្លុះកញ្ចក់ ងូតទឹក ដុសក្អែល ព្យាបាល” ឲ្យមានប្រសិទ្ធភាព និងទទួលបានជោគជ័យថែមទៀត។
ទីស្តីការគណៈរដ្ឋមន្ត្រី នៅព្រឹកថ្ងៃទី២២ ខែធ្នូ ឆ្នាំ២០១៧នេះ បានចេញសេចក្តីប្រកាសព័ត៌មាន ស្តីពី លទ្ធផលនៃសម័យប្រជុំពេញអង្គគណៈរដ្ឋមន្ត្រី ដែលបានបើកកិច្ចប្រជុំ ក្រោមអធិបតីភាព សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។ កិច្ចប្រជុំនេះ មានរបៀបវារៈចំនួន៣ រួមមាន៖១៖ សេចក្តីព្រៀងកម្មវិធីសកម្មភាពជាតិ ដើម្បីប្រយុទ្ធប្រឆាំងនឹងឱនភាពដី ឆ្នាំ២០១៧-២០២៦។២៖ សេចក្តីព្រៀងរបាយការណ៍ស្តីពីវឌ្ឍនភាពនៃការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០១៥។៣៖ បញ្ហាផ្សេងៗ៖ សំណើសុំការយល់ព្រមពីគណៈរដ្ឋមន្ត្រី ដើម្បីសុំសច្ចាប័នពីស្ថាប័ននីតិប្បញ្ញតិ្តលើកិច្ចព្រមព្រៀងពាណិជ្ជកម្ម សេវាកម្ម ក្រោមកិច្ចព្រមព្រៀងក្របខ័ណ្ឌ ស្តីពីសហប្រតិបត្តិការសេដ្ឋកិច្ច ទូលំទូលាយរវាងសមាគមប្រជាជាតិអាស៊ីអាគ្នេយ៍ និងសាធារណរដ្ឋឥណ្ឌា៕ ដោយ៖កូឡាប
ខាងក្រោមជាសេចក្តីប្រកាសលទ្ធផលនៃសម័យប្រជុំពេញអង្គគណៈរដ្ឋមន្ត្រី ៖
