ភ្នំពេញ ៖ អ្នកនាំពាក្យក្រសួងការបរទេសនិងសហប្រតិបត្តិការអន្តរជាតិ លោក ជុំ សុន្ទរី បានថ្លែងថា ស្ថានទូតកម្ពុជានៅក្រៅប្រទេស នាថ្មីៗនេះ បានអន្តរាគមន៍ជួយដល់ស្ត្រីខ្មែរ៣នាក់ នៅប្រទេសចិន និងពលករខ្មែរ២៧នាក់ នៅប្រទេសម៉ាឡេស៊ី។
នេះបើតាមសេចក្តីប្រកាសរបស់ក្រសួងការបរទេស នៅថ្ងៃទី២២ខែធ្នូនេះ បានបញ្ជាក់ថា ស្ថានឯកអគ្គរាជទូតកម្ពុជាប្រចាំប្រទេសម៉ាឡេស៊ី បានសហការជាមួយអាជ្ញាធរមានសមត្ថកិច្ច របស់ម៉ាឡេស៊ី ដោះស្រាយបញ្ហានិងរៀបចំមាតុភូមិនិវត្តន៍ របស់ពលករ-ពលការិនី ខ្មែរចំនួន២៧នាក់ ដែលមកដល់កម្ពុជា ក្នុងចន្លោះថ្ងៃទី៨ ដល់ថ្ងៃទី២៥ ខែធ្នូ ឆ្នាំ២០១៧។
ក្រសួងការបរទេស ក៏បានបញ្ជាក់បន្ថែមទៀតថា ស្ថានអគ្គកុងស៊ុលកម្ពុជាប្រចាំទីក្រុងក្វាងចូវ និងស្ថានអគ្គកុងស៊ុលកម្ពុជាប្រចាំទីក្រុងសៀងហៃ ប្រទេសចិន បានសហការជាមួយអាជ្ញាធរមានសមត្ថកិច្ចចិន ជួយសង្គ្រោះស្ត្រីខ្មែរ៣នាក់ ដែលចាញ់បោកមេខ្យល់នាំទៅរៀបការជាមួយបុរសជនជាតិចិន ហើយបានរៀបចំមាតុភូមិនិវត្តន៍មកដល់កម្ពុជាវិញ នៅថ្ងៃទី៨ និងទី១៤ ខែធ្នូ ឆ្នាំ២០១៧ ៕ ដោយ ៖ បញ្ញាស័ក្តិ
