ខេត្តព្រះសីហនុ ៖ ស្នងការដ្ឋាននគរបាលខេត្តព្រះសីហនុ បានឲ្យដឹងថា៖ នៅពេលជិតភ្លឺ ថ្ងៃទី១២ ខែមេសា ឆ្នាំ២០១៩ វេលាម៉ោង៣ និង៤០នាទី នៅក្បែរកន្លែងលក់បបរស ពេលយប់ ផ្លូវកែងមហោស្រពចាស់ សង្កាត់លេខ ២ ក្រុង/ខេត្តព្រះសីហនុ មាន ជនសង្ស័យ២នាក់ ពាក់អាវពណ៌ខ្មៅ ជិះម៉ូតូ ហុងដាសេ១២៥ ពណ៌ទឹកមាស ស្លាកលេខកណ្តាល 1AC-7843 បានធ្វើសកម្មភាព ឆក់កាបូបរបស់ ជនជាតិចិន ម្នាក់ ភេទប្រុស ដែលកំដែលកំពុងធ្វើដំណើរតាមផ្លូវ ។
ភ្លាមៗនោះ កម្លាំងល្បាត របស់ផែនព្រហ្មទណ្ឌ បានប្រទះឃើញ ហើយបានជិះម៉ូតូដេញចាប់ ប៉ផាប់ពភីង ព្រមទាំងទាក់ទង ទៅកម្លាំងល្បាតគ្រប់ច្រកល្ហក ចូលរួម ពីកម្លាំងអន្តរាគមន៍ពិសេស កម្លាំងនគរបាលក្រុង និងប៉ុស្តិ៍នគរបាលរដ្ឋបាល ទម្រាំ នឹង ដេញចាប់បាន ពួកវាជិះម៉ូតូរត់គេចវក់វី ស្ទើរពេញក្រុង និង បាត់ដានពន្លឺម៉ូតូ ម្តងៗ បន្ទាប់ពីដេញវក់វីហើយ មុខសញ្ញាបានរត់មក ម្តុំផ្លូវកែងការ៉ាសសាំងកាលតិច ជិតៗគ្នា នឹងកន្លែងដែលវាឆក់កាបូបពីដំបូង ពេលនោះសមត្ថកិច្ចបានបុកផ្តួល ស្ទាក់ចាប់បាន ជនសង្ស័យទាំង២នាក់ តែម្តង ។ ម្ចាស់កាបូបនៅមិនទាន់ ឃើញមកដាក់ពាក្យបណ្តឹងឡើយ ។ ជនសង្ស័យទាំង ២នាក់ មាន ៖
១-ឈ្មោះ ជា លីដែត ភេទប្រុស អាយុ ១៧ឆ្នាំ មុខរបរ មិនពិតប្រាកដ មានទីលំនៅ ភូមិល្វា ឃុំកោះដាច់ ខណ្ឌជ្រោយចង្វា រាជធានីភ្នំពេញ ( អ្នកជិះពីក្រោយឆក់កាបូប ) ។
២-ឈ្មោះ មិត្ត សុផាន់ណា ភេទប្រុស អាយុ ១៧ឆ្នាំ មុខរបរ បុគ្គលិកកាស៊ីណូ ជិនប៉ី មានទីលំនៅ ភូមិល្វា ឃុំកោះដាច់ ខណ្ឌជ្រោយចង្វា រាជធានីភ្នំពេញ បច្ចុប្បន្នស្នាក់នៅអាគារបុគ្គលិកកាស៊ីណូ ជិនប៉ី ភូមិ៤ សង្កាត់៤ ក្រុង-ខេត្តព្រះសីហនុ (អ្នកបើកម៉ូតូ ) ។ វត្ថុតាងចាប់យកបាន៖ ទូរស័ព្ទដៃ ១គ្រឿង ម៉ាក IPHONE6 PLUSH ពណ៌ទឹកមាស កាបូបពណ៌ខ្មៅ១ មានលុយ ១២០$ ( ផលនៃអំពើលួច ) និងម៉ូតូ ម៉ាក ហុងដាសេ១២៥ ស៊េរីឆ្នាំ២០១៩ ពណ៌ទឹកមាសមួយគ្រឿង ស្លាកលេខៈ កណ្តាល 1AC-7843 ( មធ្យោបាយជិះប្រព្រឹត្តិបទល្មើស ) ។
ករណីនេះ ការិយាល័យនគរបាលព្រហ្មទណ្ឌកម្រិតស្រាល កំពុងកសាងសំណុំរឿងតាម នីតិវិធី បញ្ជូនទៅសាលាដំបូងខេត្តព្រះសីហនុ ៕ ដោយ ៖ ស្រីនាថ
