ភ្នំពេញ ៖ មន្ត្រីប្រចាំច្រកទ្វារព្រំដែនអន្តរជាតិប៉ោយប៉ែត បានឃាត់បុរសម្នាក់ ពីបទជំរិតទារប្រាក់ពីពលករខ្មែរ មកពីប្រទេសថៃ ដើម្បីចូលរួមក្នុងពិធីបុណ្យចូលឆ្នាំថ្មី។
យោងតាមទំព័រហ្វេសប៊ុករបស់ប៉ុស្ដិ៍នគរបាលច្រកទ្វារអន្តរជាតិប៉ោយប៉ែត កាលពីថ្ងៃទី១១មេសា ឆ្នាំ២០១៩ បានបង្ហាញមុខបុរសម្នាក់ និងរៀបរាប់យ៉ាងខ្លីថា «ការឃាត់ខ្លួនមេខ្យល់ជំរិតទារប្រាក់ពីបងប្អូនពលករ នៅតែបន្តដូចភ្លៀងរលឹម។ សូមបងប្អូនមកទាក់ទងមន្ត្រីដោយផ្ទាល់ ចៀសវាងការចាញ់បោក និងខាតបង់ប្រាក់កាស»។
ពលករខ្មែរ បានសម្រុកចេញពីប្រទេសថៃ ដើម្បីចូលរួមពិធីបុណ្យ ចូលឆ្នាំប្រពៃណីខ្មែរ ដើម្បីជួបជុំសាច់ញាតិ បងប្អូន ពុក ម៉ែ មា មីង កូនក្មួយ ហើយកាលពីថ្ងៃទី១១ ខែមេសា ឆ្នាំ២០១៩ កាលពីម្សិលមិញនេះ។ ក្នុងខណៈពេលកំពុងឈរតំរៀបគ្នាជួរ តែងតែមានជនឆ្លៀតឱកាស ប្រព្រឹត្តបទល្មើសផ្សេងៗ ដូចជា ៖ ដើរតួរជាអ្នកជួយសម្រួល ដើម្បីទទួលបាននូវកំរ៉ៃជើងសារ ធ្វើអោយប៉ៈពាល់ដល់សន្តិសុខសង្គម និងខាតបង់ ថវិការបស់ពលករ។
បើតាមសមត្ថកិច្ច អន្តោរប្រវេសន៍ បានប្រាប់ឲ្យដឹងថា៖ ជនប្រព្រឹត្ត មានឈ្មោះ ខៀវ សាវុធ ភេទប្រុស អាយុ៣៦ឆ្នាំ សញ្ជាតិខ្មែរ មុខរបរអូស រទេះ បច្ចុប្បន្នស្នាក់នៅផ្ទះជួល ក្រោយនាគមាសចាស់ កាលពីព្រឹកថ្ងៃទី០៩ ខែឆ្នាំដដែល គាត់បាននាំពលករចេញពីប្រទេសថៃ មកប្រទេសកម្ពុជា ចំនួន០៣នាក់ ក្នុងតម្លៃម្នាក់៦០០ បាត។ តែពេលនាំចូលមកត្រូវមន្ត្រីប្រចាំការ នៅក្បាលស្ពាន ឃាត់ខ្លួនបានរួចបញ្ជូនមក ប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត ដើម្បីសាកសួរ។
សមត្ថកិច្ចដដែលបានបន្តថា៖ គាត់បានសារភាពទទួលកំហុស នៅចំពោះមុខសមត្ថកិច្ច និងបានធ្វើកិច្ចសន្យា បន្ទាប់ពីធ្វើកំណត់ហេតុហើយ យើងបានអនុញ្ញាតិ អោយគាត់ត្រលប់ទៅផ្ទះវិញ ។ ចំពោះទង្វើ នៃជននោះ សមត្ថកិច្ច បានពិនិត្យទៅលើធាតុផ្សំ នៃ បទល្មើស ដែលមាន ធាតុ ច្បាប់ ធាតុផ្លូវចិត្ត និង ធាតុសំភារៈ ចំពោះធាតុទាំងបីនេះ ចង់ចូលក្នុងមាត្រា ឬ ធាតុណាមួយ ជននោះមិនអាចរួចផុត ពីសំណាញ់ច្បាប់ដែរ តែដោយសារជាអំពើ របស់ជននេះ ទើបជាលើកដំបូង ហើយមិនយល់អំពីផ្លូវច្បាប់ ទើបដោះ លែងត្រឡប់ទៅវិញ ដោយគ្រាន់តែឲ្យគាត់ធ្វើកិច្ចសន្យាប៉ុណ្ណោះ ។
ទោះយ៉ាងណាអ្នកសារព័ត៌មាន មិនអាចសុំការបកស្រាយពីលោក ខឹម ចិត្រា ប្រធានប៉ុស្ដិ៍នគរបាលច្រកទ្វារនេះបានឡើយ។
ជិតបុណ្យចូលឆ្នាំខ្មែរ ពលករដែលធ្វើការនៅប្រទេសថៃជាច្រើន បាននាំគ្នាសម្រុកមកស្រុកកំណើតវិញ ដែលបណ្តាលឱ្យមានភាពកកស្ទះពេញតាមច្រកព្រំដែន និងមានអ្នកខ្យល់គរផងដែរ ពេលកំពុងតម្រង់ជួរប្រថាប់ត្រា ដោយសារតែក្តៅនិងហប់ពេក។ ជាមួយគ្នានេះ ក៏មានការលេចឮថា មន្ត្រីអន្តោប្រវេសន៍ច្រកទ្វារអន្តរជាតិប៉ោយប៉ែត បានទារប្រាក់ពីពលករមកពីប្រទេសថៃពី១០០ទៅ២០០បាតផងដែរ៕ ដោយ ៖ កូឡាប
