សៀមរាប៖ នគរបាលក្រុងសៀមរាប បានឃាត់ខ្លួនជនសង្ស័យម្នាក់ពាក់ព័ន្ទនិងករណីអំពើលួចម៉ូតូនិងរ៉ឺម៉ក់ ។ នគរបាលព្រហ្មទណ្ឌនៃអធិការដ្ឋាននគរបាលក្រុងសៀមរាប បានឲ្យដឹងថា បច្ចុប្បន្នជនសង្ស័យត្រូវបានតុលាការឃុំខ្លួនរួចហើយ ចំណែកម៉ូតូជា វត្ថុតាង សមត្ថកិច្ចនគរបាលក្រុងសៀមរាប បានធ្វើការប្រគល់ជូនជនរងគ្រោះប្រើប្រាស់វិញ។
នគរបាលព្រហ្មទណ្ឌនៃអធិការដ្ឋាននគរបាលក្រុងសៀមរាប បានប្រាប់ពីដំណើររឿងថា នៅថ្ងៃទី១៤ខែ០៤ ឆ្នាំ២០១៩វេលាម៉ោង១៨.០០នាទី ខណៈជនរងគ្រោះឈ្មោះឡុង ទុក ភេទប្រុស នៅរងចាំដឹកភ្ញៀវ នៅមុខបុរីសៀងណាំផ្លូវកែងចូលវត្តត្រាំនាគ ស្ថិតនៅភូមិធ្លកអណ្ដូង សង្កាត់ស្លក្រាមក្រុង-ខេត្តសៀមរាប ពេលនោះឡានក្រុងបានមកដល់ ហើយឈប់ខាងកើតកន្លែងជនរងគ្រោះចតរ៉ឺម៉កប្រហែល ២០ ម៉ែត្រ បន្ទាប់មកជនរងគ្រោះក៏បានដើរទៅហៅភ្ញៀវ ដោយពុំបានដកកូនសោចេញពីម៉ូតូទេ ប្រហែល១០នាទីក្រោយ ក៏ដើរត្រឡប់មកវិញ ស្រាប់តែបាត់ម៉ូតូរ៉ឺម៉ក ម៉ាកវ៉េវពណ៌ក្រហមស៊េរី ២០០១លេខតួលេខម៉ាស៊ីន ៨០ ១៩៣៥៧ ផ្លាកលេខ សៀមរាប ១H-៤៨០១ នឹងរ៉ឺម៉កមួយគ្រឿងពណ៌ស កាំបន្ទះពណ៌ក្រហមលាយពណ៌ផ្កាឈូក ។ លុះដល់ថ្ងៃទី១៥ ខែឆ្នាំដដែល វេលាម៉ោង១៣និង០០ នាទី ជនរងគ្រោះបានប្រទះ ឃើញជន សង្ស័យកំពុងជិះម៉ូតូរ៉ឺម៉ករបស់ខ្លួន ស្ថិត នៅលើផ្លូវគ្រួស ក្រហមស្ថិតនៅភូមិខ្នារសង្កាត់ជ្រាវ ក្រុង-ខេត្ត សៀមរាប ជនរងគ្រោះបានធ្វើការដេញតាម ពេលនោះជនសង្ស័យបានឈប់ម៉ូតូរ៉ឺម៉ក ហើយរត់គេចខ្លួនចូលផ្ទះរបស់ប្រជាពលរដ្ឋ តែត្រូវបានកម្លាំងប្រជាការពារ និងកម្លាំងប៉ុស្តិ៍នគរបាលរដ្ឋបាលសង្កាត់ជ្រាវ ចុះជួយអន្តរាគមន៍ធ្វើការឃាត់ ខ្លួនបានជាក់ស្តែងតែម្តង ។
នៅចំពោះមុខសមត្ថកិច្ចជនសង្ស័យ បានឆ្លើយសារភាពថា រូបគេពិតជាបានធ្វើសកម្មភាព លួចយកម៉ូតូរ៉ឺម៉ក របស់ជនរងគ្រោះពិតប្រាកដមែន។ បច្ចុប្បន្នជនសង្ស័យ ត្រូវបានតុលាការឃុំខ្លួនរួចហើយ ចំណែកម៉ូតូជា វត្ថុតាងសមត្តកិច្ចនគរបាលក្រុងសៀមរាប បានធ្វើការប្រគល់ជូនជនរងគ្រោះប្រើប្រាស់វិញផងដែរ ៕ ដោយ៖កូឡាប
