ខេត្តព្រះសីហនុ ៖ ប្រធានមន្ទីរទេសចរណ៍ខេត្តព្រះសីហនុ បានបង្ហាញថា “សង្ក្រានសមុទ្រ”ឆ្នាំ២០១៩ នាខេត្តព្រះសីហនុ ទទួលភ្ញៀវទេសចរជាតិ និងអន្តរជាតិជិត២០ម៉ឺននាក់។
ប្រធានមន្ទីរទេសចរណ៍ខេត្តព្រះសីហនុ លោក តាំង សុចិត្រគ្រឹស្នា ឲ្យដឹងថា សង្ក្រាន្តសមុទ្រ ខេត្តព្រះសីហនុ រយៈពេល៣ថ្ងៃ គឺចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០១៩ ទទួលបានភ្ញៀវទេសចរជាតិ និងអន្តរជាតិ ព្រមទាំងភ្ញៀវទេសចរចម្រុះ មកពីទីជិតទីឆ្ងាយ និងអ្នកចូលរួមមានចំនួនរហូតដល់ជិត ២០ម៉ឺននាក់។ ចំនួននេះ បានការកើនឡើងជាង ២៦ភាគរយ បើប្រៀបធៀបពិធីបុណ្យចូលឆ្នាំថ្មីប្រពៃណីជាតិនៅឆ្នាំ២០១៨កន្លងទៅ។
ត្រង់ចំណុចនេះ លោក តាំង សុចិត្រគ្រឹស្នា បញ្ជាក់ថា ៖ ចំនួនភ្ញៀវទេសចរ ដែលបាន ចូលរួមក្នុងពិធីអបអរសាទរបុណ្យចូលឆ្នាំប្រពៃណីជាតិខ្មែរ និង ពិធីបុណ្យ “សង្ក្រាន្តសមុទ្រ” នៅខេត្តព្រះសីហនុ រយៈពេល ៣ថ្ងៃ ទី១៤-១៦ ខែមេសា ឆ្នាំ ២០១៩ មានចំនួនសរុប ១៩១,៤៨៦នាក់ គឺបានកើនឡើង ២៦,៩៩% បើប្រៀបធៀបឆ្នាំ២០១៨។ ក្នុងនោះភ្ញៀវជាតិ ប្រមាណ ១៦៤,៩១៣នាក់ បានកើនឡើង ១៤,៣២% បើធៀបឆ្នាំ២០១៨ និង អន្តរជាតិប្រមាណ ២២,៥៥៣នាក់ គឺបាន កើនឡើង១៣៣,៧៧% បើធៀបឆ្នាំ២០១៨។
ដោយឡែកភ្ញៀវទេសចរជាតិ មានប្រមាណ ៨១,៣០០នាក់ បានកើនឡើង ២១,៤១% បើធៀបឆ្នាំ២០១៨ ។ ឆ្នាំ២០១៨ មសមភ្ញៀវជាតិ ៥៨,៧៤៧នាក់ បាន កើន ២,២៨% បើធៀបឆ្នាំ២០១៨ និងភ្ញៀវអន្តរជាតិ ២២,៥៥៣នាក់ បានកើនឡើង ១៣៦,៧៧% បើធៀបឆ្នាំ២០១៨។
លោក តាំង សុចិត្រគ្រឹស្នា ឲ្យដឹងដូច្នេះ រួចបញ្ជាក់ថា ភ្ញៀវដែលភ្ញៀវចូលមកទស្សនា តាមព្រលានយន្តហោះអន្តរជាតិក្រុងព្រះសីហនុសរុបប្រមាណ ៧,០០០នាក់ មានភ្ញៀវជាតិប្រមាណ ១០០នាក់ និង អន្តរជាតិប្រមាណ ៦,៩០០នាក់។
លោកថា ភ្ញៀវទេសចរចេញទៅកម្សាន្តតាមបណ្តាកោះនានា ក្នុងខេត្តព្រះសីហនុ មានភ្ញៀសរុបប្រមាណ ៦,៧០៥នាក់។ ភ្ញៀវជាតិ ៣,២៦១នាក់ និងភ្ញៀវទេសចរអន្តរជាតិមាន ៣,៤៤៤នាក់។
ចំណែកភ្ញៀវចេញទៅកម្សាន្តតាមរមណីយដ្ឋាននានា ក្នុងខេត្តព្រះសីហនុ សរុបមានចំនួន ៩,៣៤៥នាក់។ ភ្ញៀវទេសចរជាតិ ៦,៩៩១នាក់ និងអន្តរជាតិ ២,៣៥៤នាក់។
លោក សុចិត្រគ្រឹស្នា បញ្ជាក់បន្ថែមថា ភ្ញៀវទេសចរចេញទៅកម្សាន្តតាមបណ្តាឆ្នេរនានា មានចំនួនសរុប ១២៧,៦៦៤នាក់។ ភ្ញៀវទេសចរជាតិមានចំនួនសរុប ១២១,២២២នាក់ និងភ្ញៀវទេសចរអន្តរជាតិមានចំនួន ៦,៤៤២ នាក់។
“សង្ក្រាន្តសមុទ្រ”នេះដែរ លោក យន្ត មីន អភិបាលខេត្តព្រះសីហនុ មានប្រសាសន៍ថា ជាជោគជ័យដ៏ជាទីមោទនៈ។
លោកអភិបាលបានថ្លែងអំណរគុណ ដល់ប្រជាពលរដ្ឋ និងភ្ញៀវទេសចរជាតិ-អន្តរជាតិ ដែលបានចូលមកទស្សនាខេត្តព្រះសីហនុ នាឱកាសពិធីបុបណ្យចូលឆ្នាំប្រពៃណីជាតិខ្មែរឆ្នាំ២០១៩នេះ។ លោក យន្ត មីន ថ្លែងថា នឹងរង់ចាំភ្ញៀវទេសចរមកពីគ្រប់ទិសទីនៅឆ្នាំ២០២០ខាងមុខទៀត៕ ដោយ ៖ ដែន សីមា
