ប៉ូលីសនៅក្នុងទីក្រុង Hyderabad បាននិយាយថា ពួកគេបានចាប់ខ្លួនបុរសម្នាក់ បន្ទាប់ពីស្ត្រីម្នាក់ត្រូវបានគេចាក់សាំងដុតទាំងរស់ ដោយសារតែបញ្ហាជំលោះ។
ជនរងគ្រោះឈ្មោះ Sandhya Rani អាយុ ២៥ឆ្នាំ ធ្វើការជាអ្នកទទួលភ្ញៀវ។ នាងត្រូវបានបុរសម្នាក់វាយប្រហារខណៈពេលដែលនាងកំពុងធ្វើដំណើរតាមផ្លូវទៅផ្ទះ កាលពីថ្ងៃព្រហស្បតិ៍កន្លងទៅនេះ។ នេះបើតាមការបញ្ជាក់របស់ប៉ូលីសឥណ្ឌាប្រាប់ BBC។
ចំនែកជនជាប់ចោទឈ្មោះ Karthik Vanga អាយុ ២៨ឆ្នាំ ជាអតីតបុគ្គលិកធ្វើការជាមួយនឹងជនរងគ្រោះ។ ពួកគេធ្លាប់ធ្វើការជាអ្នកទទួលភ្ញៀវក្នុងក្រុមហ៊ុនជាមួយគ្នាកាលពី ប៉ុន្មានខែមុន។
ប៉ូលីសបញ្ជាក់ថា នៅពេលបុរសជាប់ចោទបានទៅក្បែរជនរងគ្រោះ អ្នកទាំងពីរត្រូវបានគេមើលឃើញថាឈ្លោះគ្នាយ៉ាងខ្លាំង មុនពេលបុរសនោះបានទាញដបសាំងមួយ ស្រោចលើនាង និងបានដុតនាងតែម្តង។
ប៉ូលីសបញ្ជាក់ទៀតថា មានការរាយការណ៏ថា បុរសជាប់ចោទបានតាមសុំជនរងគ្រោះរៀបការអស់រយៈពេល ២ឆ្នាំមកហើយ ប៉ុន្តែនាងបានបដិសេធសំណើរនោះរហូត។
អំពើហឹង្សាប្រឆាំងកុមការ និងស្ត្រីតែងតែកើតមានឡើងជាញឹកញាប់នៅក្នុងប្រទេសឥណ្ឌា។ បើតាមតួលេខរបស់រដ្ឋាភិបាលឥណ្ឌា មានការវាយប្រហារលើស្ត្រីដោយប្រើប្រាស់ទឹកអាស៊ីតជាច្រើនរយករណីក្នុងមួយឆ្នាំៗ៕ សុភ័ក្ត្រ
