ខេត្តស្វាយរៀង ៖ មានករណីគ្រោះថ្នាក់ចរាចរណ៍រវាងរថយន្តនិងរថយន្ត បណ្តាលអោយរងរបួសស្រាល បុរសម្នាក់ ចំណែករថយន្តខូចខាតស្រាល០១ ធ្ងន់០១ ។ ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពី ថ្ងៃសៅរ៍ ៦កើត ខែបុស្ស ឆ្នាំរកា ព.ស២៥៦១ត្រូវនិងថ្ងៃទី២៣ ខែ ធ្នូ ឆ្នាំ ២០១៧ វេលាម៉ោង០០និង៤០នាទី នៅចំណុចលើផ្លូវជាតិលេខ១ គីឡូម៉ែត្រលេខ១៣៨-១៣៩ស្ថិតក្នុងភូមិលៀប ឃុំកណ្តៀងរាយ ស្រុកស្វាយទាប ខេត្តស្វាយរៀង ។
សមត្ថកិច្ចបានឱ្យដឹងថា ៖ រថយន្តទី១ ម៉ាកនីសសាន់ ពណ៌ក្រហមស្លាក់លេខ ចង្កូតស្តាំTK-០១១០ទិសដៅពីលិចទៅកើត អ្នកបើកបរគេចចេញពីកន្លែងកើតហេតុ ។
ដោយឡែករថយន្តទី២ បើកបរដោយឈ្មោះ ប៉ុល សារឿន ភេទប្រុស អាយុ ៣៧ឆ្នាំ ជនជាតិខ្មែរ មុខរបររត់តាក់ស៊ី មានទីលំនៅ ភូមិអូសំដី ឃុំធ្លក ស្រុកស្វាយជ្រំ ខេត្តស្វាយរៀង រងរបួសស្រាល បើកបររថយន្ត ម៉ាកហាយឡែនឌរ័ ពណ៍ទឹកប្រាក់ ស្លាកលេខភ្នំពេញ២AK-៤៣៣៩ ទិសដៅពីកើតទៅលិច រងរបួសស្រាល។
ប្រភពដដែលបានឱ្យដឹងទៀតថាៈមូលហេតុនៃគ្រោះថ្នាក់ចរាចរណ៍ខាងលើនេះបណ្តាលមកពីអ្នកបើកបររថយន្តនីសសាន់មិនប្រកាន់ស្តាំ។
ដោយឡែកប្រភពព័ត៌មានពីប្រជាពលរដ្ឋវិញបានឱ្យដឹងថា ៖ នៅត្រង់ចំណុចកើតហេតុជាកន្លែងផ្លូវកោង ហើយគួបផ្សំនិងពេលយប់ជ្រៅ ឬអាចតៃកុងរថយន្តស្រវឹងស្រាផងនោះ អ្នកបើកបរទំនងជាបើករថយន្តដោយប្រើប្រាស់ល្បឿនលឿនហួសកំណត់បើកបរមិនប្រកាន់ស្តាំរៀងៗខ្លួននោះឡើយ ទើបបណ្តាលឱ្យមានគ្រោះថ្នាក់ដូចច្នេះ។
នេះសំណាងហើយប្រសិនបើគ្រោះថ្នាក់នៅពេលថ្ងៃហើយចំពេលរថយន្តដឹកកម្មកររោងចក្រធ្វើដំណើររឺក៍ម៉ោងសិស្សសាលាចេញពីរៀនវិញនោះច្បាស់ជាមានអ្នករងគ្រោះថ្នាក់ជាច្រើនអ្នកមិនខាននោះទេ។
សូមបញ្ជាក់ផងដែរថា ៖ រយៈពេលប៉ុន្មានថ្ងៃកន្លងមកនេះ ករណីគ្រោះថ្នាក់ចរាចរណ៍នៅក្នុងភូមិសាស្ត្រ នៃខេត្តស្វាយរៀង មានការកើនឡើងគួរឱ្យកត់សម្គាល់បើទោះបីជារដ្ឋបាលខេត្តស្វាយរៀង បានខិតខំដាក់ភ្លើងសញ្ញាចរាចរណ៍នៅតាមផ្លូវកែងមួយចំនួនក្នុងខេត្តស្វាយរៀង ក៏ដោយក៏ករណីគ្រោះថ្នាក់ចរាចរណ៍នៅពុំទាន់បានកាត់បន្ថយបាននៅឡើយ គឺអ្នកធ្វើដំណើរពុំសូវគោរពភ្លើងសញ្ញាចរាចរណ៍នោះទេ លុះត្រាណាទាល់តែមានកំលាំងសមត្ថកិច្ចផ្នែកចរាចរណ៍ចុះមកតាមគោលដៅ ទើបអ្នកដំណើរទាំងនោះខ្លាចសមត្ថកិច្ចបានមួយគ្រា។
ប្រជាពលរដ្ឋលោកសំណូមពរដល់ថ្នាក់ដឹកនាំរដ្ឋបាលខេត្តសូមជួយដាក់កំលាំងសមត្ថកិច្ចជំនាញនៅតាមដងផ្លូវដែលងាយរងគ្រោះឡើងវិញ ដើម្បីជួយសម្រួលចរាចរណ៍ផង និងដើម្បីឲ្យប្រជាពលរដ្ឋចូលរួមគោរពច្បាប់ចរាចរណ៍ឡើងវិញ កាត់បន្ថយនូវបញ្ហាគ្រោះចរាចរណ៍ដែលកើតមកពីការមិនគោរពច្បាប់និងសិទ្ធិអាទិភាពក្នុងការធ្វើដំណើរនៅតាមដងផ្លូវសាធារណៈក៏ដូចជាការចូលរួមអនុវត្តនូវគោលនយោបាយរបស់រាជរដ្ឋាភិបាលកម្ពុជាភូមិឃុំមានសុវត្ថិភាពទាំង៩ចំណុចឲ្យទទួលបានជោគជ័យ៕ វ៉ៃកូ
