រដ្ឋមន្ត្រីការបរទេសអាមេរិច លោក Mike Pompeo បានថ្លែងកាលពីថ្ងៃសុក្រម្សិលមិញថា គាត់នៅតែជាអ្នកទទួលបន្ទុកលើកិច្ចចរចារនុយក្លេអ៊ែរជាមួយកូរ៉េខាងជើងដដែល ទោះបីជារបបនោះបានទាមទារឲ្យដករូបលោកចេញពីការចរចា ។
ក្រោយពេលកិច្ចចរចាជាមួយកូរ៉េខាងជើងគ្មានបានផលសោះ លោក Mike Pompeo បានធ្វើការថ្លែងយ៉ាងខឹងក្រោធនៅក្នុងសេក្តីថ្លែងការណ៍នៅសប្តាហ៍នេះ ដែលជាហេតុធ្វើឲ្យកូរ៉េខាងជើង ហៅអ្នកការទូតអាមេរិចរូបនោះថា គ្មានប្រយោជន៍ ធ្វេសប្រហែស និងមិនមានភាពចាស់ទុំ ព្រមទាំងទាមទារឲ្យអាមេរិចដករូបលោកចេញពីកិច្ចចរចានុយក្លេអ៊ែរនៅពេលអនាគត។
លោក Mike Pompeo ត្រូវបានគេជឿជាក់ថាជាអ្នកជំរុញឲ្យប្រធានាធិបតី ដូ ណាល់ត្រាំ ឲ្យប្រកាន់ជំហររឹងមាំជាមួយនឹងមេដឹកនាំកូរ៉េខាងជើងក្នុងកំឡុងកិច្ចប្រជុំកំពូលរបស់ពួកគេកាលពីខែកុម្ភៈ នៅទីក្រុងហាណូយ ដែលបញ្ចប់ទៅដោយគ្មានបានអ្វីទាំងអស់។
លោក បានថ្លែងនៅក្នុងសន្និសិទដូច្នេះថា “គ្មានអ្វីផ្លាស់ប្តូរនោះទេ។ ពួកយើងកំពុងបន្តធ្វើកិច្ចការដើម្បីចរចា ។ ខ្ញុំនៅតែជាអ្នកទទួលបន្ទុកលើកិច្ចការនោះ”។
លោក Mike Pompeo ដែលធ្លាប់បានធ្វើដំណើរទៅកាន់កូរ៉េខាងជើងចំនួន ៤ដងកាលពីឆ្នាំមុន បានថ្លែងបន្តថា គាត់នៅតែមានក្តីសង្ឃឹមក្នុងការសម្រេចបានកិច្ចព្រមព្រៀង ដែលធ្វើឲ្យសម្រេចការសន្យារបស់ គីម ជុងអ៊ុនក្នុងការបោះបង់ចោលអាវុធនុយក្លេអ៊ែរ៕
អត្ថបទប្រែសម្រួលដោយ៖ សុភ័ក្ត្រ
ប្រភព៖ Channelnewsasia