ខេត្តកណ្តាល ៖ នគរបាលស្រុកស្អាងបានដឹងថា ស្គាល់មុខ ស្គាល់មាត់ មិនស្គាល់ចិត្ត រាប់អានៗ បោកម៉ូតូយកទៅបាត់ បានប៉ូលីសជួយរកឃើញវិញ។ ករណីឆបោក ម៉ូតូនេះ នគរបាលស្រុកស្អាងបានចាប់ជនសង្ស័យរួមជាមួយវត្ថុតាងម៉ូតូឌ្រីមសង់មួយគ្រឿង ហើយម៉ូតូនេះត្រូវបានសមត្ថកិច្ចប្រគល់ជូនម្ចាស់ដើមវិញផងដែរ ដែល កើតហេតុនៅថ្ងៃ១៥កើត ខែចេត្រឆ្នាំកុរ ឯកស័កព.ស២៥៦២ ត្រូវនឹងថ្ងៃ ទី១៩ ខែមេសា ឆ្នាំ២០១៩ វេលាម៉ោង១៤និង០០នាទី ស្ថិតនៅចំណុចភូមិរកា ឃុំក្រាំងយ៉ូវ ស្រុកស្អាង ខេត្ដកណ្ដាល ។
នគរបាលមូលដ្ឋានបានបន្ថែមថា ជនរងគ្រោះ ឈ្មោះសុន ថាវរី ភេទស្រី អាយុ ១២ឆ្នាំ ជនជាតិខ្មែរ មុខរបរជា(សិស្ស) មានទីលំនៅភូមិរកា ឃុំក្រាំងយ៉ូវ ស្រុកស្អាង ។ ចំណែកជនសង្ស័យ ឈ្មោះឆៅ វ៉ាន់នីភេទប្រុស អាយុ ២២ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិទួលខ្មួញ ឃុំទឹកវិលស្រុកស្អាង ខេត្តកណ្តាល។
ការបាត់បង់៖ ម៉ូតូចំនួន ១គ្រឿងម៉ាកហុងដាសេ១២៥ ពណ៍ខ្មៅ
នៅថ្ងៃទី១៩មេសា២០១៩វេលាម៉ោង១៤ និង០០នាទី មានឈ្មោះឆៅ វ៉ាន់នី ដែលរាប់អាន និងបានមកលេងនៅផ្ទះឈ្មោះរុំ ស្រីសាវ (ត្រូវជាម្ដាយឈ្មោះសុន ថាវរី) ស្ថិតនៅភូមិរកា ឃុំក្រាំងយ៉ូវ ពេលនោះឈ្មោះឆៅ វ៉ាន់នី បានប្រើឲ្យឈ្មោះសុន ថាវរី ទៅទិញបាកាស់ឲ្យខ្លួន ។ ពេលនោះ ឈ្មោះសុន ថាវរី បានជិះម៉ូតូទៅទិញបាកាស់មកឲ្យ ភ្លាមនោះឈ្មោះឆៅ វ៉ាន់នី បានខ្ចីម៉ូតូពីឈ្មោះសុន ថាវរី ដោយនិយាយថា ទៅទិញសាំងមកចាក់ម៉ូតូ(គុបជ្រុង)របស់ខ្លួន រួចឈ្មោះសុន ថាវរី ក៏បានប្រគល់ម៉ូតូម៉ាកហុងដាសេ១២៥ ខាងលើ ទៅឈ្មោះឆៅ វ៉ាន់នី ជិះទៅបាត់រហូតដល់សព្វថ្ងៃ ដោយបន្សល់ទុកនូវម៉ូតូម៉ាកហុងដាគុបជ្រុង១គ្រឿង នៅកន្លែងកើតហេតុ ។ លុះថ្ងៃទី២០មេសា២០១៩ វេលាម៉ោង១០ព្រឹក ទើបមានឈ្មោះរុំ ស្រីសាវ បានមកប្ដឹងសមត្ថកិច្ចនគរបាលប៉ុស្តិ៍ក្រាំងយ៉ូវ ។
ក្រោយពេលទទួលបានព័ត៍មាននេះភ្លាម លោកវរសេនីយ៍ឯក សេង សុជាតិ អធិការនគរបាលស្រុកស្អាង បានបញ្ជាកម្លាំងប៉ុស្ដិ៍ក្រាំងយ៉ូវ សហការជាមួយកម្លាំងផ្នែកព្រហ្មទណ្ឌស្រុក ធ្វើការស្រាវជ្រាវ ប្រមូលផ្ដុំសំណុំរឿង និងបាន សហការជាមួយកម្លាំងនគរបាលប៉ុស្ដិ៍ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ឃាត់ខ្លួនបានឈ្មោះឆៅ វ៉ាន់នី រួមទាំងវត្ថុតាង (ម៉ូតូ) នៅថ្ងៃទី២១មេសា២០១៩ រួច បញ្ជូនមកអធិការដ្ឋាននគរបាលស្រុកស្អាង ដើម្បីបន្ដអនុវត្តតាមនីតិវីធី ៕ ដោយ៖កូឡាប