ភ្នំពេញ ៖ បុគ្គលឈ្មោះស៊ូ យានត្រូវបានសមត្ថកិច្ចឃាត់ខ្លួនបញ្ជូនមកស្នងការនគបាលខេត្តត្បូងឃ្មុំ ក្រោយពីបង្ហោះ ចែកចាយសារប្រមាថសម្តេចតេជោហ៊ុន សែន និងប្រជាពលរដ្ឋដែលគាំទ្រការដឹកនាំរបស់សម្តេចតេជោហ៊ុន សែន នៅលើបណ្តាញសង្គមហ្វេសប៊ុករបស់ខ្លួន នៅថ្ងៃទី២២មេសានេះ។
សមត្ថកិច្ចឃាត់ខ្លួនជនរូបនោះ បញ្ជូនមកស្នងការនគបាលខេត្តត្បូងឃ្មុំ ក្រោយពេលលោកប៉ាន់ខែម ប៊ុនថន មន្ត្រីជាន់ខ្ពស់ក្នុងជួរគណបក្សប្រជាជនកម្ពុជា ដាក់ពាក្យប្តឹងឈ្មោះស៊ូ យាននេះចែកចាយសារប្រមាថមើលងាយសម្តេចតេជោហ៊ុន សែន និងប្រជាពលរដ្ឋដែលគាំទ្រការដឹកនាំរបស់សម្តេចតេជោហ៊ុន សែន នៅលើហ្វេសប៊ុក។
លោកប៉ាន់ខែម ប៊ុនថន បានសរសេរសារលើផេកហ្វេសប៊ុក នៅថ្ងៃទី២២មេសានេះថា ព្រហើនណាស់បុគ្គលនេះ បានប្រមាថមកលើសម្តេចតេជោហ៊ុន សែន និងអ្នកគាំទ្រសម្តេចទាំងអស់បែបនេះ ក្នុងនាមប្រជាពលរដ្ឋខ្មែរម្នាក់ដែលគាំទ្រការដឹកនាំរបស់សម្តេចតេជោហ៊ុន សែន យើងខ្ញុំមិនសុខចិត្តជាដាច់ខាត ចុះអ្នកទាំងអស់គ្នាវិញយល់យ៉ាងណាដែរ?
លោកស៊ូ យាន សមាជិកក្រុមប្រឹក្សាខេត្ត ត្បូងឃ្មុំ កូតាគណបក្សសង្គ្រោះជាតិ រស់នៅស្រុកមេមត់ ខេត្តត្បូងឃ្មុំ ត្រូវបានប៉ូលិសចាប់ខ្លួន នៅម៉ោងប្រមាណ៣និង៣០នាទីរសៀលថ្ងៃទី២២ ខែមេសា ឆ្នាំ២០១៩នេះ ខណៈពេលគាត់សម្រាកលើអង្រឹងនៅក្រោមផ្ទះ៕ ដោយ៖កូឡាប