មេដឹកនាំកូរ៉េខាងជើង គីម ជុងអ៊ុន បានថ្លែងនៅក្នុងជំនួបកំពូលជាមួយនឹងមេដឹកនាំរុស្សី ពូទីនថា សន្តិភាព និងសន្តិសុខនៅឧបទ្វីបកូរ៉េនឹងពឹងផ្អែកទាំងស្រុងទៅលើអាកប្បកិរិយាពេលអនាគតរបស់ សហរដ្ឋអាមេរិច។ នេះបើតាមការចេញផ្សាយរបស់សារពត៌មានរដ្ឋកូរ៉េខាងជើង KCNA នៅថ្ងៃសុក្រនេះ។
គីម ជុងអ៊ុនថ្លែងថា នៅពេលនេះ គាត់នឹងរងចាំរហូតដល់ដាច់ឆ្នាំនេះ ដើម្បីអោយអាមេរិចមាន អាកប្បកិរិយាចេះបត់បែន។
គីម ជុងអ៊ុន បញ្ជាក់ថា “ស្ថានភាពនៅឧបទ្វីបកូរ៉េ និងក្នុងតំបន់ ពេលនេះកំពុងស្ថិតក្នុងភាពទាល់ច្រក និងឈានដល់ចំនុចអាក្រក់មួយ ហើយប្រហែលវាអាចនឹងត្រឡប់ទៅកាន់សភាពអាក្រក់ដូចដើម ខណៈដែលសហរដ្ឋអាមេរិចបានប្រកាន់អាកប្បកិរិយាឯកតោភាគីក្នុងទំនុកចិត្តអាក្រក់ នៅកិច្ចប្រជុំកំពូលកាលពីពេលថ្មីៗនេះ”។
មេដឹកនាំផ្តាច់ការវ័យក្មេងរូបនេះថ្លែងទៀតថា “កូរ៉េខាងជើងនឹងប្រុងប្រៀបខ្លួនចំពោះស្ថានភាពដែលអាចកើតមានឡើង”។
សូមបញ្ជាក់ថា មេដឹកនាំកូរ៉េខាងជើងទើបតែបានបញ្ចប់ដំណើរទស្សនៈកិច្ចទៅកាន់ប្រទេសរុស្សី និងបានត្រឡប់មកកាន់កូរ៉េខាងជើងវិញ។ ការធ្វើដំណើរទៅរុស្សីនោះ ត្រូវបានអ្នកវិភាគមើលឃើញថា កូរ៉េខាងជើងកំពុងស្វែងរកការគាំទ្រពីរុស្សី ជុំវិញបញ្ហានុយក្លេអ៊ែរ។
គីម ជុងអ៊ុន ក៏បានអញ្ជឹងប្រធានាធិបតីរុស្សីអោយមកលេងកូរ៉េខាងជើងផងដែរក្នុងពេលវេលាដ៏សប
ស្របណាមួយ ហើយមេដឹកនាំរុស្សីបានទទួលយកការអញ្ជើញនោះ៕
អត្ថបទប្រែសម្រួលដោយ៖ សុភ័ក្រ
ប្រភព៖ CGTN