ខេត្តព្រះសីហនុ៖ មន្ត្រីអង្គការសមាគមការពារអភិរក្សសត្វព្រៃ(WCS) បានឲ្យដឹងថា នៅព្រឹកថ្ងៃសុក្រ ទី២៦ ខែមេសានេះ អង្គការ WCS បាននាំសត្វអណ្ដើកហ្លួងចំនួន ២០ក្បាលទៀត យកទៅលែងឲ្យរស់នៅក្នុងព្រែកធម្មជាតិវិញ។ ពិធីនេះ រៀបចំនៅឃុំចំការហ្លួង ស្រុកកំពង់សិលា ខេត្តព្រះសីហនុ។
មន្ត្រីទំនាក់ទំនងសាធារណៈ នៃអង្គការ (WCS) បានឲ្យដឹងថា អណ្ដើកហ្លួងទាំង២០ក្បាល ដែលត្រូវនាំយកទៅលែងនោះ គឺបានមកពីការភ្ញាស់ពង របស់សត្វអណ្ដើកហ្លួង ដែលយកចេញពីសម្បុកពង របស់វា ហើយយកទៅភ្ញាស់ នៅមជ្ឈមណ្ឌល ចិញ្ចឹមអណ្ដើកហ្លួង មានទីតាំង នៅខេត្តកោះកុង។
លោក សោម ស៊ីថា នាយកគ្រប់គ្រងអង្គការ(WCS) ប្រចាំកម្ពុជា បានឲ្យដឹងថា រាប់បញ្ជូលទាំងលើកនេះ បានលែងសត្វអណ្ដើកហ្លួង ចូលទៅក្នុងព្រែកធម្មជាតិ បានចំនួន ៣លើកហើយ គឺកាលពីឆ្នាំ២០១៥ មានចំនួន២១ក្បាល, ឆ្នាំ២០១៧ ចំនួន២៥ក្បាល និងឆ្នាំ២០១៩នេះ បានលែងចំនួន២០ក្បាលទៀត។
កម្មវិធីលែងសត្វអណ្ដើកហ្លួង នៅថ្ងៃទី២៦ ខែមេសានេះ បានរៀបចំឡើងនៅភូមិត្រាច ឃុំចំការហ្លួង ស្រុកកំពង់សិលា ខេត្តព្រះសីហនុ។
លោក សោម ស៊ីថា បន្តថា សត្វអណ្ដើកហ្លួងទាំង ២០ក្បាលខាងលើនេះ មានអាយុប្រមាណ ១២ឆ្នាំ។ ហើយថា សត្វអណ្តើកហ្លួង ដែលបាននាំយកទៅលែងឲ្យរស់តាមបែបធម្មជាតិវិញនេះ គឺមានបំពាក់ឧបករណ៍តាមដានជាប់ខ្លួនវា ហើយអង្គការ WCS ក៏មានឧបករណ៍សម្រាប់តាមដាន មើលការបំលាស់ទី របស់ពួកវាផងដែរ។
ទាក់ទងបញ្ហានេះ លោក អេង ជាសាន ប្រធានរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ ដែលបានចូលរួមជាអធិបតី ក្នុងពិធីលែងសត្វអណ្តើកហ្លួង កាលពីព្រឹកថ្ងៃទី២៦ ខែមេសា ឆ្នាំ២០១៩។ លោកបញ្ជាក់ថា បច្ចុប្បន្ននេះតាមការប៉ាន់ស្មានអណ្តើកហ្លួង ដែលកំពុងតែរស់នៅក្នុងព្រែកធម្មជាតិ នាស្រុកកំពង់សិលា ខេត្តព្រះសីហនុ អាចមានចន្លោះចាប់ពី ៧០ ទៅ ៨០ក្បាលតែប៉ុណ្ណោះ។ ហើយថា វាជាប្រភេទសត្វនៅក្នុងបញ្ជីក្រហម នៃសត្វជិតផុតពូជនៅក្នុងពិភពលោក។
លោក អេង ជាសាន បន្តថា ការបាត់បង់សត្វនេះនៅកម្ពុជាដោយសារមនុស្សចេះតែចាប់វាធ្វើចំណី និងបាត់បង់ដោយសារបាត់ជំរក របស់វា ដោយសកម្មភាព បូមខ្សាច់ នាំឲ្យបាត់ជម្រកពងកូន របស់ពួកវាជាដើម..។
កម្មវិធីលែងអណ្តើកហ្លួង ឬសត្វអណ្តើកសរសៃខាងលើនេះ មានការចូលរួមពី លោក អេង ជាសាន ប្រតិភូរាជរដ្ឋាភិបាលទទួលបន្ទុកប្រធានរដ្ឋបាលជលផលកម្ពុជា, លោក George Edgar ឯកអគ្គរដ្ឋទូតសហភាពអុឺរ៉ុប ប្រចាំកម្ពុជា អាជ្ញាធររដ្ឋបាលខេត្តព្រះសីហនុ និងខេត្តកោះកុង ព្រមទាំងមន្ត្រីអាជ្ញាធរអង្គភាពពាក់ព័ន្ធ, អាជ្ញាធរមូលដ្ឋាន ប្រជាពលរដ្ឋក្នុងសហគមន៍ និងដៃគូពាក់ព័ន្ធមួយចំនួនទៀត។
កម្មវិធីលែងសត្វអណ្ដើកហ្លួង ឬសត្វអណ្តើកសរសៃនេះ មានទីតាំងស្ថិតនៅភូមិបឹងត្រាវ ឃុំចំការហ្លួង ស្រុកកំពង់សិលា ខេត្តព្រះសីហនុ៕ ដោយ ៖ ដែន សីមា