រដ្ឋាភិបាលមីយ៉ានម៉ា នៅថ្ងៃសុក្រនេះ បានធ្វើការលើកលែងទោសទៅដល់អ្នកទោសចំនួន ៦.៩៤៨នាក់ បន្ថែមទៀត ដែលការលើកលែងដោយគ្មានលក្ខ័ណនេះធ្វើឡើងតាមហេតុផលមនុស្សធម៌ និងជាឥរិយាបទដើម្បីអប់អរឆ្នាំថ្មីប្រពៃណីជាតិរបស់ប្រទេសនេះ ដែលចាប់ផ្តើមកាលពីថ្ងៃទី ១៧ខែមេសានេះ។
ការលើកលែងទោសបន្ថែមនៅថ្ងៃសុក្រនេះ ធ្វើឲ្យចំនួនអ្នកទោសដែលទទួលបានការលើកលែងទោសកើន ដល់ចំនួន ១៦,៤៨៣នាក់។
នៅថ្ងៃបុណ្យចូលឆ្នាំប្រពៃណី រដ្ឋាភិបាលប្រទេសនេះ បានលើកលែងទោសដល់អ្នកទោសចំនួន ៩,៥៣៥ និងជនបរទេសចំនួន ១៦នាក់។
ការពិនិត្យពិច័យនឹងធ្វើឡើងទៀត ដើម្បីលើកលែងទោសដល់អ្នកទោសផ្សេងដែលសមនឹងទទួលបាន ការត្រាប្រណី។ នេះបើតាមការបញ្ជាក់របស់លិខិតបង្គាប់បញ្ជារបស់រដ្ឋាភិបាល។
សូមរម្លឹកថា កាលពីថ្ងៃបុណ្យចូលឆ្នាំថ្មី ឆ្នាំមុន មីយ៉ានម៉ាបានដោះលែងអ្នកទោសជាតិចំនួន ៨,៤៩០នាក់ និងជនបរទេសចំនួន ៥១នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Xinhua