ប្រធានាធិបតី ស្រីលង្កា លោក Maithripala Sirisena បានថ្លែងថា មេក្លោងដែលនៅពីក្រោយការបំផ្ទុះគ្រាប់បែកនៅស្រីលង្កា កាលពីថ្ងៃអាទិត្យកន្លងទៅនេះ បានស្លាប់នៅក្នុងការវាយប្រហារនៅសណ្ឋាគារមួយ។
លោកថ្លែងថា មេក្លោងរូបនោះដែលមានឈ្មោះថា Zahran Hashim បានស្លាប់នៅក្នុងសណ្ឋាគារ Shangri-La ស្ថិតក្នុងរដ្ឋធានី កូឡុំបូ ប្រទេសស្រីលង្កា។
លោកប្រធានាធិបតីបញ្ជាក់ថា Zahran Hashim បានដឹកនាំការវាយប្រហារនៅសណ្ឋាគារដ៏មានពេញនិយមមួយ រួមទាំងជនបំផ្ទុះគ្រាប់បែកម្នាក់។
ការវាយប្រហារដោយគ្រាប់បែកដ៏កក្រោយក្នុងប្រទេសស្រីលង្កាកន្លងទៅនេះ បានផ្តាច់ជីវិតមនុស្សចំនួន ២៥០នាក់ និងរងរបួសជិត ៥០០នាក់។ ក្រុមភេវរករបានដាក់គោលដៅវាយប្រហារកន្លែងសំខាន់ៗដូចជា ព្រះវិហារ និងសណ្ឋាគារជាច្រើន ក្នុងរដ្ឋធានីកូឡុំបូ។
លោកប្រធានាធិបតីថ្លែងបន្តទៀតថា ភ្នាក់ងារស៊ើបអង្កេតរបស់ស្រីលង្កាជឿជាក់ថា មានជនសង្ស័យចំនួន ១៣០នាក់ដែលជាបណ្តាញរបស់ក្រុមរដ្ឋអ៊ីស្លាម កំពុងស្ថិតនៅក្នុងប្រទេស ហើយប៉ូលីសកំពុងតែតាមប្រមាញ់ពួកគេ ៧០នាក់ដែលកំពុងរត់គេចខ្លួន។
សូមរម្លឹកថា ក្រោយការវាយប្រហារ ពួកក្រុមរដ្ឋអ៊ីស្លាមបានចេញមុខអះអាងថា ជាទំនួលខុសត្រូវរបស់ពួកគេ ហើយការវាយប្រហារនោះគឺជាការសងសឹកទៅនឹងការបាញ់ប្រហារទៅលើ ក្រុមអ្នកកាន់សាសនាអ៊ីស្លាម ស្ថិតក្នុងទីក្រុង Christchurch ប្រទេសញូវស៊ីឡែន៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
