ភ្នំពេញ ៖ អ្នកនាំពាក្យក្រសួងមហាផ្ទៃ ខៀវ សុភ័គ កាលពីថ្ងៃទី២៩ខែមេសាឆ្នាំ២០១៩ បានបដិសេធលិខិតដែលបង្ហាញពីការធ្វើកំណែទម្រង់ស៊ីជម្រៅនៅក្រសួងមហាផ្ទៃ ត្រូវបានគេចែកចាយលើបណ្ដាញសង្គម facebook ក៏ដូចជាសារព័ត៌មានក្នុងស្រុកមួយចំនួន ព្រោះលិខិតទាំងនោះ ជាលិខិតក្លែងក្លាយ មិនផ្លូវការ គ្មានការបោះត្រា គ្មានការចុះហត្ថលេខា និងចុះថ្ងខែត្រឹមត្រូវនោះទេ។
បើតាមការដកស្រង់ពីបណ្ដាញសារព័ត៌មានក្នុងស្រុកមួយបានផ្សាយថា លោកអ្នកនាំពាក្យក្រសួងមហាផ្ទៃ បានអះអាងថា ជាលិខិតក្លែងក្លាយ និងមិនផ្លូវការ ខណៈក្នុងលិខិតបានបង្ហាញពីលំដាប់ឋានន្តរស័ក្តិនគរបាល និងក្របខ័ណ្ឌក្រសួងមហាផ្ទៃ ដែលជាកំណែទម្រង់ថ្មី ក្នុងជួរកងកម្លាំងប្រដាប់អាវុធ។
ការចែកចាយលិខិតនោះ កើតមានឡើងបន្ទាប់ពីសម្តេចតេជោនាយករដ្ឋមន្ត្រី ហ៊ុន សែន កាលពីថ្ងៃទី ២៧ មេសា បានណែនាំទៅកាន់សម្តេចពិជ័យសេនា ទៀ បាញ់ រដ្ឋមន្ត្រីក្រសួងការពារជាតិ និងសម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ ឲ្យកាត់បន្ថយផ្កាយក្នុងជួរ កងទព័ និងនគរបាល ដែលជាការ កែទម្រង់មួយ ឲ្យមានសមភាពក្នុងជួរកងកម្លាំង។
លោក ខៀវ សុភ័គ បានអោយដឹងថា ក្រុមមន្ត្រីជំនាញបានរៀបចំធ្វើកំណែទម្រង់នេះរួចរាល់ហើយ ប៉ុន្ដែក្រសួងមហាផ្ទៃ មិនទាន់ចេញលិខិតផ្លូវការណាមួយ ជូនដល់សាធារណជននៅឡើយទេ។ លិខិតដែលគេនាំគ្នាចែកចាយ លើបណ្ដាញហ្វេសប៊ុកនោះ គឺជាលិខិតមិនផ្លូវការ ព្រោះគ្មានវាយត្រាគ្មានថ្ងៃខែ និងគ្មានអ្នកចុះហត្ថលេខាត្រឹមត្រូវ។ ក្នុងលិខិតហ្នឹងមិនអាចយកជាផ្លូវការបានទេ ជួនកាលគេបង្ហោះលេងតែខ្លួនគេទៅ អាលិខិតក្លែងក្លាយឥឡូវមិនពិបាកធ្វើទេប្អូន ជនខិលខូច គេចង់ធ្វើម៉េចក៏បានដែរ តែសំខាន់មានបោះត្រា មានថ្ងៃខែ មានឈ្មោះអ្នកស៊ីញ៉េ ឬអត់? បើអត់ទេ កុំជឿវាអីប្អូន ព្រោះនេះគ្រាន់តែក្រុមបណ្ដាញសង្គមចែកចាយគ្នាលេងទេ៕ ដោយ ៖ បញ្ញាស័ក្តិ
