ភ្នំពេញ ៖ នៅមុនពេលនៃការបើកកិច្ចប្រជុំគណៈកម្មការកិច្ចសហប្រតិបត្តិការ និងអភិវឌ្ឍន៍APF ដែលនឹងរៀបចំធ្វើនៅប្រទេសកម្ពុជានាពេលខាងមុខ លោកបណ្ឌិត ប៉ែន បញ្ញា ប្រធានគណៈកម្មការនីតិកម្ម និងយុត្តិធម៌នៃរដ្ឋសភា និងជាប្រធានក្រុមសភាជាតិកម្ពុជា APF នៅព្រឹកថ្ងៃទី២៩ ខែមេសា ឆ្នាំ២០១៩នេះ បានដឹកនាំកិច្ចប្រជុំក្រុមសភាជាតិកម្ពុជា APF ដើម្បីពិនិត្យមើលខ្លឹមសារឯកសារនានា សម្រាប់ការត្រៀមចូលរួមក្នុងកិច្ចប្រជុំ គណៈកម្មការកិច្ចសហប្រតិបត្តិការ និងអភិវឌ្ឍន៍APF ដែលនឹងប្រព្រឹត្តទៅចាប់ពីថ្ងៃទី៣ ដល់ថ្ងៃទី៤ ខែឧសភា ឆ្នាំ២០១៩ ខាងមុខ នៅរាជធានី ភ្នំពេញ។
សមាសភាពចូលរួមក្នុងកិច្ចប្រជុំដែលបានរៀបចំឡើងនៅវិមានរដ្ឋសភានាពេលនេះ មានឯកឧត្ដម លោកជំទាវ ជាសមាជិកសមាជិការដ្ឋសភា ព្រឹទ្ធសភា មន្ត្រីលេខាធិការដ្ឋានរដ្ឋបាលនៃក្រុមសភាជាតិកម្ពុជា APF និងមន្ត្រីពាក់ព័ន្ធនៃអគ្គលេខាធិការដ្ឋានសភាមួយចំនួនទៀត។
លោក ហេង រដ្ឋា ប្រធាននាយកដ្ឋានស្រាវជ្រាវកិច្ចការអន្តរជាតិនៃអគ្គលេខាធិការដ្ឋានរដ្ឋសភា និងជាប្រធានលេខាធិការដ្ឋានរដ្ឋបាល នៃក្រុមសភាជាតិកម្ពុជា APF បានជម្រាបជូនអំពីបច្ចុប្បន្នភាពនៃដំណើរការនៃការរៀបចំឯកសារ ការសិក្សាស្រាវជ្រាវ និងការងារផ្សេងៗមួយចំនួន ទៀតរបស់លេខាធិការដ្ឋានរដ្ឋបាលនៃក្រុមសភាជាតិកម្ពុជា APF សម្រាប់បម្រើជូនឯកឧត្ដម លោកជំទាវ ជាសមាជិក សមាជិកា រដ្ឋសភា ព្រឹទ្ធសភា ដែលត្រូវចូលរួមក្នុងកិច្ចប្រជុំនាពេលខាងមុខថា មកដល់ពេលនេះបានរួចរាល់អស់ហើយ ដែលនៅពេលនេះក្រុមការងារនឹងរាយការណ៍ដោយសង្ខេប ជូនអង្គប្រជុំបានជ្រាប។
លោក ប៉ែន បញ្ញា ប្រធានក្រុមសភាជាតិកម្ពុជា APF ក៏បានមានប្រសាសន៍ជម្រាបជូនអង្គប្រជុំផងដែរអំពីចំណុចសំខាន់ៗមួយចំនួន ដើម្បីជាគន្លឹះសម្រាប់សមាជិកសមាជិកា រដ្ឋសភា ព្រឹទ្ធសភា ក្នុងការចូលរួមពិភាក្សាក្នុងកិច្ចប្រជុំរបស់ APF ក៏ដូចជាសម្រាប់ការជួបជជែកពិភាក្សា ផ្សេងៗជាមួយគណៈប្រតិភូប្រទេសជាសមាជិក APF ដែលនឹងមកចូលរួមប្រជុំនាពេលខាងមុខ។
លោក ប៉ែន បញ្ញា បានមានប្រសាសន៍ណែនាំឲ្យ លេខាធិការដ្ឋានរដ្ឋបាលនៃក្រុមសភាជាតិកម្ពុជា APF បន្តយកឯកសារដែលបានរៀបចំ ហើយនេះ ទៅធ្វើការកែសម្រួលខ្លឹមសារ នឹងពាក្យពេចន៍ជាភាសាបារាំងមួយចំនួន ឲ្យបានកាន់តែល្អប្រសើរ ទៅតាមអ្វីដែលសមាជិកអង្គប្រជុំបាន លើកឡើងនៅក្នុងអង្គប្រជុំនាពេលនេះ ហើយឯកឧត្ដមនឹងធ្វើការពិនិត្យជាចុងក្រោយបន្ថែមទៀត។
លោក មានប្រសាសន៍ទៀតថា ឆ្លងតាមបទពិសោធន៍ ដែលសភាកម្ពុជាធ្លាប់បានរៀបចំ និងចូលរួមក្នុងកិច្ចប្រជុំអន្តរជាតិជាច្រើនកន្លងមក ឯកឧត្តមបណ្ឌិត ជឿជាក់ថា តាមរយៈការត្រៀមរៀបចំរបស់ក្រុមការងារយើងនេះ កិច្ចប្រជុំគណៈកម្មការកិច្ចសហប្រតិបត្តិការ និងអភិវឌ្ឍន៍ APF ដែលរៀបចំធ្វើនៅប្រទេសកម្ពុជានាពេលខាងមុខ នឹងទទួលបានជោគជ័យជាក់ជាមិនខាន៕ ដោយ ៖ កូឡាប
