ប្រទេសអ៊ីរ៉ងបានធ្វើការប្រហារជីវិតយុវជនវ័យក្មេង ២រូបយ៉ាងអាថ៌កំបាំងកាលពីសប្តាហ៍មុន។ នេះបើតាមការបញ្ជាក់របស់អង្គការលើកលែងទោសអន្តរជាតិ ដែលបានរិះគន់យ៉ាងខ្លាំងលើប្រទេសនេះ ដែលមើលងាយច្បាប់អន្តរជាតិ និងសិទ្ធិកុមារ។
អង្គការលើកលែងទោសអន្តរជាតិបានថ្លែងក្នុងសេចក្តីប្រកាសថា យុវជ័យ ២នាក់ជាបងប្អូនជីដូនមួយនឹងគ្នា មានឈ្មោះ Mehdi Sohrabifar និង Amin Sedaghat អាយុ ១៧ឆ្នាំ ត្រូវបានធ្វើការប្រហារជីវិតកាលពីថ្ងៃទី ២៥ ខែមេសា នៅក្នុងគុកមួយ ស្ថិតក្នុងភាគខាងជើង ទីក្រុង Shiraz ក្រោយមានការកាត់ទោសពួកគេដោយមិនមានយុត្តិធម៌។
យុវជនទាំង ២នោះត្រូវបានកាត់ទោសពីបទរំលោភជាច្រើនករណី។
អង្គការសិទ្ធិមនុស្សដដែលលើកឡើងថា យុវជនទាំងនោះ ដែលត្រូវចាប់ខ្លួនកាលពីឆ្នាំ ២០១៧ កាលនៅអាយុ ១៥ឆ្នាំ មិនបានដឹងថា ពួកគេត្រូវបានកាត់ទោសប្រហារជីវិតនោះឡើយ រហូតដល់មុនពេល មានការប្រហារជីវិតពួកគេ។ នៅលើសាកសពរបស់ពួកគេ មានស្នាមវាយ ដែលវាជាការបង្ហាញថា ពួកគេរងការវាយដុំយ៉ាងខ្លាំងមុនពេលស្លាប់។
អង្គការខាងលើបញ្ជាក់ទៀតថា ក្មេងប្រុសទាំង ២នាក់នោះមិនទទួលបានអ្នកតំណាងផ្លូវច្បាប់ដើម្បីការពារក្តីពួកគេនោះទេ ក្នុងដំណាក់កាលស៊ើបអង្កេត ក្រោយពេលមានការចាប់ខ្លួនពួកគេ។ ពួកគេត្រូវបានឃុំខ្លួននៅកន្លែងប៉ូលីសអស់រយៈពេល ២ខែ ដែលនៅកន្លែងនោះពួកគេនិយាយថា ពួកគេរងការវាយដុំយ៉ាងខ្លាំង៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN