ពលរដ្ឋកាណាដាម្នាក់ ត្រូវបានកាត់ទោសប្រហារជីវិតនៅក្នុងប្រទេសចិន ពីបទផលិត និងជួញដូរគ្រឿងញៀនយ៉ាងច្រើន។ នេះបើតាមការប្រកាសរបស់តុលាការចិននៅថ្ងៃអង្គារម្សិលមិញនេះ។
នេះគឺជាការកាត់ទោសប្រហារជីវិតពលរដ្ឋកាណាដាទី ២ហើយក្នុងឆ្នាំនេះ ជុំវិញការជួយដូរគ្រឿងញៀន ក្រោយទំនាក់ទំនងរវាងចិន និងកាណាដា កំពុងតែស្ថិតក្នុងចំនុចអាក្រក់ខ្លាំង បន្ទាប់ពីកាណាដា បានធ្វើការចាប់ខ្លួន នាយកផ្នែកហិរញ្ញវត្ថុរបស់ក្រុមហ៊ុន Huawei តាមសំណើររបស់អាមេរិច។
បើតាមសេចក្តីប្រកាសរបស់តុលាការចិន ក្នុងខេត្ត Guangdong បានឲ្យដឹងថា មានមនុស្សសរុបចំនួន ១១នាក់ត្រូវបានកាត់ទោស ដោយក្នុងនោះក៏មានជនជាតិអាមេរិចម្នាក់ និងមិចស៊ិចកូ ៤នាក់ផងដែរ។
ក្នុងចំណោម ១១នាក់ មានតែជនជាតិកាណាម្នាក់ប៉ុណ្ណោះ រួមទាំងជនជាតិចិនម្នាក់ដែរ ត្រូវបានកាត់ទោសប្រហារជីវិត។
ការកាត់ទោប្រហារជីវិតនេះលើពួកគេទាំង ២នោះ គឺដោយសារតែការជាប់ពាក់ព័ន្ធរបស់ពួកគេ ក្នុងការរៀបចំ ប្រតិបត្តិការជួយដូរគ្រឿងញៀនកាលពីឆ្នាំ ២០១២។ បើតាមសេចក្តីប្រកាស ពួកគេជាប់ពាក់ព័ន្ធនឹងការជួយដូរគ្រឿងញៀនសរុបចំនួន ៦៣គីឡូក្រាម។
សូមបញ្ជាក់ថា កាលពីខែមករាកន្លងទៅ ជនជាតិកាណាដាម្នាក់ឈ្មោះ Robert Lloyd Schellenberg ក៏ត្រូវតុលាការចិនកាត់ទោសប្រហារជីវិតផងដែរ បន្ទាប់ពីមានការកាត់ក្តីយ៉ាងលឿន ដែលជាហេតុធ្វើឲ្យទំនាក់ទំនងរវាងកាណាដា និងចិន ធ្លាក់ចូលដល់ចំនុចអាប់អួរយ៉ាងខ្លាំង៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC