ខេត្តស្វាយរៀង ៖ លោកតូច ប៉ូលីវ៉ាអភិបាលរងខេត្តស្វាយរៀងនាព្រឹកថ្ងៃព្រហស្បតិ៍ ១៣រោច ខែចេត្រ ឆ្នាំកុរ ឯកស័ក ព.ស ២៥៦២ ត្រូវនឹងថ្ងៃទី០២ ខែឧសភា ឆ្នាំ២០១៩នេះបានដឹកនាំមន្ត្រីបន្តអនុវត្ត ទិវាសម្អាតអនាម័យបរិស្ថានប្រចាំខែ លើកទី៣០ នៅខេត្តស្វាយរៀងបានចូលរួមសម្អាតអនាម័យបរិស្ថាន នៅទីតាំងចាប់ពីខាងមុខការិយាល័យរដ្ឋសភាទៅដល់ខាងក្រោយមន្ទីរសាធារណការ និងដឹកជញ្ជូនខេត្ត ផងដែរ។
មន្ត្រីសាលាខេត្តស្វាយរៀងបានឱ្យដឹងថា ៖ ដោយអនុវត្តតាមការណែនាំរបស់លោក ម៉ែន វិបុល អភិបាលខេត្តស្វាយរៀង និងក្នុងគោលបំណងជំរុញលើកទឹកចិត្ត និងចលនាបំផុសស្មារតី ឲ្យថ្នាក់ដឹកនាំខេត្ត ក្រុង ស្រុក មន្ទីរ-អង្គភាព មន្ត្រីរាជការ និងប្រជាពលរដ្ឋទាំងអស់ ចូលរួមសម្អាតអនាម័យ បរិស្ថាន គោលដៅធ្វើឲ្យទីក្រុង និងទីប្រជុំជនកាន់តែមានសោភ័ណភាពស្រស់បំព្រងគ្មានសំរាមនៅតាមដងផ្លូវ តាមទីផ្សារ តាមទីប្រជុំជន តាមសួនច្បារ និងតាមទីសាធារណៈ ធានាសុខមាលភាពរបស់ប្រជាពលរដ្ឋឲ្យបានល្អប្រសើរ ។ល។
មន្ត្រីសាលាខេត្តស្វាយរៀងបានឱ្យដឹងទៀតថា ៖ ដើម្បីចូលរួមចំណែកជំរុញចលនាប្រឡងប្រណាំងទីក្រុងស្អាត ថ្នាក់ដឹកនាំមន្ត្រីរាជការសាលាខេត្ត សាលាក្រុងស្វាយរៀង និងមន្ទីរ-អង្គភាពនានាជុំវិញខេត្ត បានបន្តចុះធ្វើការសម្អាតបរិស្ថាន នៅតាមដងផ្លូវ សួនច្បារ និងជុំវិញផ្សារ ក្នុងក្រុងស្វាយរៀង ទៅតាមតម្រាយផ្លូវ និងទីតាំងដែលបានកំណត់ ៕ ដោយ ៖ វ៉ៃកូ
