តាកែវ ៖ រឿងអ្នកមានអំណាចធ្វើរបងលើប្រឡាយទឹកនៅភូមិចក សង្កាត់រកាក្នុង ក្រុងដូនកែវ ខេត្តតាកែវ មន្ទីរធនធានទឹក និងមន្ទីរសាធារណការនិងដឹកជញ្ជូនខេត្ត ខិតខំធ្វើរឿងនេះអោយល្អដែរតែ ទៅមិនរួចជាមួយនិងអ្នកមានអំណាចនោះទេ ។ ការលើកឡើងនេះគឺបន្ទាប់ពីភ្នាក់ងារ CEN បានធ្វើការសំភាសន៏តាមទូរស័ព្ទផ្ទាល់ជាមួយនិងលោក ប៊ុន ហួរ ប្រធានមន្ទីរធនធានទឹក និងឧតុនិយមខេត្ត នៅថ្ងៃទី ០៣ ខែឧសភា ឆ្នាំ២០១៩នេះ ។ លោក ប៊ុន ហួរ បាននិយាយថា ពិតជាមានប្រឡាយដែលគ្មានទឹកហូរនោះមែន តែកន្លែងនោះគេហៅថាប្រឡាយរំដោះទឹកចេញ តែត្រូវអ្នកមានអំណាចមួយរូប បានព័ទ្ធរបងថ្មបិទខាងលើប្រឡាយនិងតែម្តង ហើយលោក រួមជាមួយមន្ទីរពាក់ព័ន្ធ ជាពិសេសមន្ទីរសារធារណការនិងដឹកជញ្ជូនខេត្ត លោកខំខ្នះខ្នែងណាស់ដើម្បីដោះស្រាយបញ្ហានេះ តែទៅមិនរួចជាមួយនិងអ្នកមានអំណាចនោះឡើយ ហើយលោកបានបន្តថា បើចង់ដឹងច្បាស់សួរទៅក្រុង ព្រោះក្រុងជាអ្នកសិទ្ធិលើការងារនេះធំជាងមន្ទីរជំនាញ ។
សូមបញ្ជាក់ផងដែរថា ក្រោយពេលពង្រីកផ្លូវក្នុងក្រុងដូនកែវទើបដឹងថាមានស្ពាន តែគ្មានផ្លូវទឹក ព្រោះផ្លូវទឹកនោះត្រូវបានអ្នកមានអំណាចមួយរូបព័ទ្ធរបងយកបាត់ទៅហើយ ។ ពលរដ្ឋដែលធ្វើដំណើរឆ្លងកាត់លើផ្លូវជាតិលេខ ២ ផ្លូវក្នុងក្រុង បាននិយាយដោយចោទជាសំនួរថា ៖ បើធ្វើស្ពានគ្មានផ្លូវទឹកហូរទៅហើយចាំបាច់ធ្វើស្ពានធ្វើអីទៀត ចាក់ដីលុបធ្វើជាផ្លូវតែម្តងទៅ ព្រោះអ្នកមានអំណាចគេព័ទ្ធរបងយកផ្លូវទឹកទៅហើយនឹង? ជុំវិញបញ្ហាកន្ទេលធំបន្លំដេកនេះ ពលរដ្ឋជាច្រើនរស់នៅក្នុងក្រុងដូនកែវ កំពុងរងចាំការបកស្រាយពីអាជ្ញាធរខេត្តថា តើអ្នកមានអំណាចណាមួយ ដែលមានចិត្តលោភលន់ចង់បានសូមបីតែប្រឡាយរំដោះទឹកចេញពីក្រុងក៏ព័ទ្ធរបងយកដែរ? ហើយអាជ្ញាធរខេត្ត និងមានវិធានការបែបណាដែរ បើសិនជារឿងនេះជាការពិតមែននោះ ? តាកែវ
