ប្រទេសកូរ៉េខាងជើងបានធ្វើការបាញ់សាកល្បងមីស៊ីលរយៈចំងាយខ្លីជាច្រើនគ្រាប់ពីឧបទ្វីប Hodo ស្ថិតនៅភាគខាងកើតប្រទេស។ នេះបើតាមសេចក្តីរាយការណ៍ពីកូរ៉េខាងត្បូង។
មីស៊ីលរយៈចំងាយខ្លីជាច្រើនគ្រាប់ដែលបានបាញ់ចេញ ហោះក្នុងរយៈចំងាយចន្លោះពី ៧០ ទៅ ២០០គីឡូម៉ែត្រ។ នេះបើតាមការចុះផ្សាយរបស់សារពត៌មានកូរ៉េខាងត្បូង Yonhap ដែលធ្វើការដកស្រង់សំដីមន្ត្រីយោធាជាន់ខ្ពស់របស់កូរ៉េខាងត្បូង។
ឧបទ្វីប Hodo ត្រូវបានកូរ៉េខាងជើងប្រើប្រាស់ក្នុងពេលអតីតកាល ដើម្បីធ្វើការបាញ់សាកល្បងមីស៊ីល និងកាំភ្លើងធំរយៈចំងាយឆ្ងាយ។
សូមរម្លឹកផងដែរថា កាលពីខែមុន ទីក្រុងព្យុងយ៉ាងក៏បានធ្វើការបាញ់សាកល្បងមីស៊ីល ដែលខ្លួនបានអះអាងថា ជាមីស៊ីលយុទ្ធិសាស្ត្រប្រភេទថ្មី ដែលការបាញ់សាកល្បងនោះ គឺជាលើកដំបូង ក្រោយជំនួបរវាង គីម ជុងអ៊ុន និងដូណាល់ ត្រាំ បានបញ្ចប់ដោយគ្មានកិច្ចព្រមព្រៀងអ្វីទាំងអស់៕ អត្ថបទប្រែសម្រួលដោយ៖ សុភ័ក្រ
ប្រភព៖ BBC