ខេត្តស្វាយរៀង ៖ មានការភ្ញាក់ផ្អើលមួយដោយសារមានគ្រូពេទ្យឯកជនម្នាក់បានចាក់ថ្នាំមួយម្ជុលទៅលើបុរសម្នាក់ដែលមានជម្ងឺឈឺបំពង់ក ហើយបានប្រកាច់ស្លាប់យ៉ាងអាណោចអធ័ម កាលពីវេលាម៉ោង១២និង០៥នាទី ថ្ងៃទី៣ ខែមេសា ឆ្នាំ២០១៩ នៅចំណុចភូមិសំឡីខាងជើង ឃុំសំឡី ស្រុកកំពង់រោទិ៍ខេត្តស្វាយរៀង។
បើតាមសមត្ថកិច្ចមូលដ្ឋានបានអោយដឹងថា៖ ជនរងគ្រោះមាន ឈ្មោះ ប៊ុន ម៉ាប់ ភេទប្រុស អាយុ ៤៥ឆ្នាំ មានទីលំនៅភូមិឃុំខាងលើ ដោយខ្លួនមានអាការៈឈឺបំពង់ក ចំនួនពីរថ្ងៃមកហើយពុំបាត់ ទើបខ្លួនបានហៅគ្រូពេទ្យឯកជនឈ្មោះព្រាប សេ ភេទប្រុស អាយុ៦៣ឆ្នាំ មានទីលំនៅភូមិព្រៃម្នាស់ ឃុំសំឡីស្រុកកំពង់រោទ៌មកចាក់ថ្នាំអោយ ខណៈពេលដែលពេទ្យមកដល់បានបូមថ្នាំមួយសឺរ៉ាំង ហើយចាក់ទៅលើជនរងគ្រោះឈ្មោះ ប៊ុន ម៉ាប់ មិនទាន់ទាំងអស់ពីសឺរ៉ាំងផង ស្រាប់តែជនរងគ្រោះមានអាការៈរមាស់ក្រហល់ក្រហាយ រួចបានប្រកាច់ដាច់ខ្យល់ស្លាប់ភ្លាមៗតែម្ដង ។
សមត្ថកិច្ចបានអោយដឹងទៀតថាមូលហេតុដែលបណ្តាលឲ្យជនរងគ្រោះស្លាប់ដោយសារ ប្រតិកម្មថ្នាំ។
ចំណែកឯជនសង្ស័យជាគ្រូពេទ្យឯកជនត្រូវបានសមត្ថកិច្ចធ្វើការឃាត់ខ្លួនដើម្បីសាកសួរចាត់ការទៅតាមនីតិវិធីច្បាប់។
ចំពោះករណីគ្រូពេទ្យចាក់ថ្នាំស្លាប់មនុស្សនេះ បើតាមប្រជាពលរដ្ឋនៅឃុំសំឡីបានឲ្យដឹងថា ៖ គ្រូពេទ្យឈ្មោះព្រាប សេ គាត់ចេះជំនាញពេទ្យនេះពុំមានសាលាច្បាស់លាស់នោះទេ ដោយចេះចាក់ថ្នាំតាំងពីសម័យប៉ុលពតមកម្លេះ ហើយបន្តអាជីពនេះរហូតដល់បច្ចុប្បន្ន រយៈកាលកន្លងមកធ្លាប់ត្រូវបានមន្ទីរជំនាញហៅមកអប់រំផងដែរ តែគាត់នៅតែដើរព្យាបាលគេដដែល ទើបភ្លាត់ស្នៀតចាក់ថ្នាំបណ្តាលឲ្យស្លាប់មនុស្សតែម្តង ។ ប្រភពបន្តទៀតថា គាត់ព្យាបាលមិនថាមនុស្សសត្វនោះទេគឺចាក់ទាំងអស់ទាំងសត្វក្របីគោនិងមនុស្សអោយតែត្រូវគាត់ជួយព្យាបាល ៕ ដោយ ៖ វ៉ៃកូ