ភ្នំពេញ ៖ លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានដឹកនាំគណៈប្រតិភូជាន់ខ្ពស់ ក្រសួងសេដ្ឋកិច្ច និងហិរញ្ញវត្ថុ អញ្ជើញទៅចូលរួមកិច្ចប្រជុំជាន់ខ្ពស់ ស្តីពី “ចីរភាពបំណុល សម្រាប់ចីរភាពកំណើន: ចីរភាពហិរញ្ញប្បទាន សម្រាប់ការអភិវឌ្ឍន៍ (Sustainable Debt for Sustainable Growth: Sound Financing for Development) នៅទីក្រុងប៉ារីស, ប្រទេសបារាំង នាល្ងាចថ្ងៃទី ០៣ ខែ ឧសភា ឆ្នាំ ២០១៩ ។
បើតាមក្រសួងសេដ្ឋកិច្ចហិរញ្ញវត្ថុ កិច្ចប្រជុំជាន់ខ្ពស់នេះ និងមានការចូលរួម ពីសំណាក់រដ្ឋមន្ត្រីហិរញ្ញវត្ថុ ទេសាភិបាលធនាគារកណ្ដាល ប្រធានស្ថាប័នអន្តរជាតិ ស្ថាប័នសិក្សាស្រាវជ្រាវ និងតំណាងពីស្ថាប័នហិរញ្ញវត្ថុឯកជនធំៗ មកពីតាមបណ្ដាប្រទេសប្រមាណ 60 លើពិភពលោករួមមាន រដ្ឋមន្ត្រីហិរញ្ញវត្ថុបារាំង ដែលជាម្ចាស់ផ្ទះ រដ្ឋមន្ត្រីហិរញ្ញវត្ថុអាមេរិក ជប៉ុន និងទេសាភិបាលធនាគារកណ្ដាលចក្រភពអង់គ្លេស ជាដើម។
ក្រោមប្រធានបទ “ចីរភាពបំណុល សម្រាប់ចីរភាពកំណើនៈ ចីរភាពហិរញ្ញប្បទានសម្រាប់ការអភិវឌ្ឍ” កិច្ចប្រជុំគ្រូនឹងផ្ដោត ការពិភាក្សាទៅលើប្រធានបទសំខាន់ៗ រួមមាន យុទ្ធសាស្ត្រក្នុងការបំពេញ តម្រូវការហិរញ្ញប្បទាន ដើម្បីជំរុញការអភិវឌ្ឍ ផ្នែកសេដ្ឋកិច្ចរបស់ប្រទេសនីមួយៗ និងសម្រេចបាននូវគោលដៅ អភិវឌ្ឍន៍ប្រកបដោយចីរភាព ដោយរួមទាំងហិរញ្ញប្បទាន សម្រាប់គម្រោងអភិវឌ្ឍន៍ ហេដ្ឋារចនាសម្ព័ន្ធរូបវ័ន្តផងដែរ ព្រមទាំងវិធីសាស្ត្រ ដែលប្រទេសមានតម្រូវការ ហិរញ្ញប្បទានសម្រាប់អភិវឌ្ឍ អាចអនុវត្តបានដោយចៀសវាង នូវការជំពាក់បំណុលច្រើន ហួសហេតុ។
ជាមួយគ្នានោះដែរតាមការគ្រោងទុក លោកអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងចុះហត្ថលេខា លើកិច្ចព្រមព្រៀង ហិរញ្ញប្បទាន សហប្រតិបត្តិការ សម្រាប់គម្រោងធ្វើនូវប្រតិកម្ម លើប្រព័ន្ធបណ្ដាញបញ្ជូន និងចែកចាយអគ្គិសនី ក្នុងទឹកប្រាក់ប្រមាណ 29,១ លានអឺរ៉ូ ដែលគម្រោងនេះ មានទិសដៅក្នុងការពង្រីក និងអភិវឌ្ឍន៍ប្រព័ន្ធគ្រប់គ្រងអគ្គិសនី ឲ្យមានការវិវឌ្ឍ ទៅរកប្រព័ន្ធវៃឆ្លាត Smart Grid ដែលអាចសម្រួលយ៉ាងច្រើន ក្នុងការគ្រប់គ្រងប្រព័ន្ធ បណ្ដាញអគ្គីសនី ទងមូល ក៏ដូចជា បង្កើនប្រសិទ្ធភាពនិងនិរន្តភាព ក្នុងការផ្គត់ផ្គង់ថាមពលអគ្គិសនី នៅកម្ពុជា៕ ដោយ៖កូឡាប