ខេត្តមណ្ឌលគិរី ៖ ដែនជម្រកសត្វព្រៃស្រែពក ដែលសម្បូរណ៍ទៅដោយធនធានធម្មជាតិ និងជីវៈចម្រុះ ព្រមទាំងផូស៊ីល ផងនោះ កាលពីពេលថ្មីៗនេះ ក៏បានបង្ហាញអំពីបច្ចេកវិទ្យាថ្មីសន្លាងមួយទៀត គឺឧបករណ៍សម្រាប់ស្រូបយកសំណើមជាតិទឹកពីបរិយាកាស ឬទឹកសន្សើម ដើម្បីស្ដុកទឹកសម្រាប់ប្រើប្រាស់ នៅគ្រាដែលរដូវក្ដៅបានឈានចូលមកដល់។
លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរី បានមានប្រសាសន៍ឲ្យដឹងថា នេះជាឧបករណ៍ថ្មីសន្លាងមួយទៀត ដែលជាបច្ចេកវិទ្យាថ្មី ដើម្បីស្រូបយកសំណើមជាតិទឹកពីបរិយាកាស ទុកសម្រាប់ឲ្យមន្ត្រីឧទ្យានុរក្សប្រើប្រាស់។ លោកថ្លែងថា «ឧបករណ៍នេះអាចស្រូបយកសំណើមជាតិទឹក ពីបរិយាកាសបានប្រមាណជា២០លីត្រក្នុង១ថ្ងៃ»។ លោកបញ្ជាក់ថា ឧបករណ៍នេះ គឺជាជួយឧបត្ថម្ភគាំទ្រពីសំណាក់អង្គការ WWF ដែលជាអង្គការដៃគូ ហើយការស្រូបយកជាតិទឹកពីបរិយាកាស ឬទឹកសន្សើមនេះ គឺអ្នកជំនាញដែលរៀបចំដំឡើង បាននិងកំពុងយកទឹកដែលស្រូបយកបានទៅវិភាគសិន ដោយមិនទាន់អនុញ្ញាតឲ្យប្រើប្រាស់ឡើយ។
ទន្ទឹមគ្នានេះ លោកប្រធានមន្ទីរបរិស្ថានខេត្តមណ្ឌលគិរី បានសហការជាមួយអង្គការដៃគូ WWF ត្រៀមដឹកទឹកដោយប្រើស៊ីទែន យកទៅបង្ហូរចូលទៅក្នុងថ្លុកត្រពាំង ទឹកច្រប់មួយចំនួន នៅក្នុងព្រៃនៃដែនជម្រកសត្វព្រៃស្រែពក ដែលជាទីដែលសត្វព្រៃចូលចិត្តមកផឹក ជាប្រចាំផងដែរ៕ ដោយ៖បញ្ញាស័ក្តិ