កំពង់ស្ពឺ ៖ ស្នងការដ្ឋាននគរបាលខេត្តកំពង់ស្ពឺ បានឲ្យដឹងថា នៅចំណុចភ្លេីងស្តុបថ្មី មុនមន្ទីរសាធារណការខេត្ដកំពង់ស្ពឺ ស្ថិតលើផ្លូវជាតិលេខ៤ ភូមិសំណង់ សង្កាត់រការធំ ក្រុងច្បារមន រសៀលថ្ងៃ សៅរ៍ ទី ៤ ខែឧសភា ឆ្នាំ ២០១៩ វេលាម៉ោង១៦.២០ នាទី ម៉ូតូមួយគ្រឿង ម៉ាក ស៊ុយស៊ូគី លែតពណ៌ខៀវ គ្មានស្លាកលេខ ជិះគ្នាពីរនាក់ បើកបរពីខាងកើតទៅលិច មកដល់ចំណុចគោលដៅភ្លេីងស្ដុប “ពណ៌ក្រហមមិនព្រមឈប់ រួចព្យាយាមបើកទៅមុខទាំងបំពាន” រួចបានទៅបុកអ្នកជិះកង់ដែលកំពុងឈប់ស្ដុបបណ្ដាលឲ្យរងរបួសជាទម្ងន់(បោកក្បាល)។
តាមការបញ្ជាក់អោយដឹងពីជំនាញចរាចរណ៍ ជន បង្កមានឈ្មោះ ពេជ្រ ពន្លឺ ភេទឬ្រុស អាយុ17 ឆ្នាំ នៅភូមិចំបក់ ឃុំវល្លិស ស្រុកសំរោងទង ជាអ្នកបើកម៉ូតូ រីឯអ្នករួមដំណើរមានឈ្មោះ ឈួន រដ្ឋា ប្រុស អាយុ 17ឆ្នាំ នៅភូមិតាគាំ ឃុំវល្លិស ស្រុកសំរោងទង។ ចំណែកជនរងគ្រោះមានឈ្មោះ លី ថាវ៉ាន់ ភេទស្រី អាយុ18ឆ្នាំ នៅភូមិញរ សង្កាត់កណ្ដោលដុំ ក្រុងច្បារមន។
បច្ចុប្បន្នវត្ថុតាងម៉ូតូប្រគល់ជូនការិយាល័យចរាចរណ៍ខេត្ត រក្សាទុកបណ្ដោះអាសន្ន រងចាំកសាងសំណុំរឿងចាត់ការតាមនីតិវិធីច្បាប់៕ ដោយ៖កូឡាប