ខេត្តព្រះសីហនុ ៖ ប្រជាពលរដ្ឋរស់នៅក្រុងព្រះសីហនុ បានបញ្ចេញមតិផ្សេងៗគ្នា ទៅលើករណីអគ្គីភ័យឆេះបង្គាលភ្លើងជាបន្តបន្ទាប់បណ្តាលឲ្យខូចខាតទាំងទ្រព្យសម្បត្តិរដ្ឋ និងឯកជនមួយចំនួន ប៉ុន្តែមិនមានអ្នកទទួលខុសត្រូវ។
ប្រជាពលរដ្ឋឲ្យដឹងថា ជាក់ស្តែងកាលពីយប់ថ្ងៃទី៤ ខែឧសភា ឆ្នាំ២០១៩ មានអគ្គីភ័យឆាបឆេះបង្គោលភ្លើងមួយកន្លែងទៀត មានទីតាំងនៅជិតធនាគារជាតិខេត្តព្រះសីហនុ ស្ថិតក្នុងសង្កាត់លេខ៣ ប៉ុន្តែត្រូវបានសមត្ថកិច្ចចេញឡានទឹក ដើម្បីអន្តរាគន៍ជួយពន្លត់ភ្លាមៗមិនឲ្យឆេះរាលដាល។
ករណីអគ្គីភ័យឆេះបង្គាលភ្លើងជាបន្តបន្ទាប់មកនេះ បើតាមការអះអាង របស់មន្ត្រីថ្នាក់ទាបអគ្គីសនីខេត្តព្រះសីហនុ បញ្ជាក់ថា ភាគច្រើនកើតឡើងដោយសារបណ្តាញខ្សែកាបផ្សេងៗ..។
យ៉ាងនេះក្តី ប្រជាពលរដ្ឋ រិះគន់ថា អគ្គីភ័យឆេះបង្គោលភ្លើងនេះ បើទោះជាករណីខ្លះ មិនមានប៉ះពាល់កើតជាមហន្តរាយធ្ងន់ធ្ងរដល់អាយុជីវិតមនុស្ស ឬផ្ទះសម្បែង របស់ប្រជាពលរដ្ឋបែបណាក្តី ក៏ប៉ុន្តែករណីអគ្គីភ័យឆេះ នៅតាមបង្គោលភ្លើង ក្នុងក្រុងព្រះសីហនុ ជាបន្តបន្ទាប់មកនេះ គឺបានរំខាងទៅដល់ការរស់នៅ របស់ប្រជាពលរដ្ឋ មានផ្ទះនៅក្បែរខាងបង្គោលភ្លើង ដែលឆេះនោះ។ ក្នុងនោះមានដូចជា៖ ចរន្តអគ្គីសនីត្រូវបានកាត់ផ្តាច់ ឬគ្មានភ្លើងប្រើប្រាស់, ដាច់បណ្តាញអុិនធើណែត ឬបណ្តាញទូរទស្សន៍ខ្សែកាបជាដើម ដែលមានបណ្តាញតភ្ជាប់នឹងបង្គោលភ្លើងដែលឆេះនោះ ដាច់មិនដំណើរការជាដើម..។
ត្រង់ចំណុចនេះ ប្រជាពលរដ្ឋរស់នៅក្នុងក្រុងព្រះសីហនុ បានលើកជាយោបល់ថា ករណីឆេះបង្គោលភ្លើងនេះ អាជ្ញាធរស្ថាប័នពាក់ព័ន្ធ និងអង្គភាពអគ្គីសនីខេត្តព្រះសីហនុ ត្រូវតែរិះរកវិធីដោះស្រាយ ដើម្បីកាត់បន្ថយបាតុភាពអវិជ្ជខាងលើនេះ តាមរយៈការរៀបចំបង្គោលភ្លើង ឬប្រព័ន្ធខ្សែបណ្តាញប្រកបដោយបច្ចេកទេស ត្រឹមត្រូវ និងយកវិធានការច្បាប់មកអនុវត្តន៍ផងដែរ ប្រសើរជាងពេលមានភ្លើងឆេះបង្គោលភ្លើងកើតមានម្តងៗ និងបំផ្លាញទ្រព្យសម្បត្តិទាំងរដ្ឋ និងឯកជន គឺអង្គភាពអគ្គីសនីខេត្តនេះ តែងឆ្លើយដោះសារយករួចខ្លួន គ្មានអ្នកទទួលខុសត្រូវ ហើយបានទម្លាក់កំហុស ទៅឲ្យស្ថាប័នផ្សេងៗជាដើម..។
ផ្តើមពីបញ្ហានេះ សម្រាប់ប្រជាពលរដ្ឋ ដែលប្រើប្រាស់សេវាទាំងអស់ខាងលើសុទ្ធតែបង់ប្រាក់ជាប្រចាំខែគ្រប់ចំនួន។ ដូច្នេះចាំបាច់ មន្ត្រីឬផ្នែកពាក់ព័ន្ធទាំងអស់ គប្បីជួយមានវិធានការដោះស្រាយ ជូនប្រជាពលរដ្ឋឲ្យទទួលយកសេវាទាំងនោះ ឲ្យបានល្អប្រសើរ និងស្របតាមគោលនយោបាយ របស់រាជរដ្ឋាភិបាលកម្ពុជាបានដាក់ចេញ។ ដោយមិនត្រូវទុកឲ្យពលរដ្ឋក្លាយជាអ្នករងគ្រោះពីការធ្វេសប្រហែសផ្នែកបច្ចេកទេសណាមួយកើតឡើងទៀតទេ ព្រោះ ថា បញ្ហាបច្ចេកទេស មនុស្សជាអ្នកធ្វើ ឬជាអ្នកបង្កើតឡើង គឺមិនមែនជាកត្តាគ្រោះធម្មជាតិនោះទេ។
ឆ្លើយតបបញ្ហានេះ អគ្គីសនីខេត្តព្រះសីហនុ កាលពីថ្ងៃអាទិត្យ ទី៥ ខែឧសភា ឆ្នាំ២០១៩ បានបង្ហោះសារ និងសកម្មភាពក្រុមការងារបច្ចេកទេស របស់ខ្លួន ចុះកាត់សម្អាតខ្សែកាបអុីនធឺណែត ខ្សែកាបអុបទិក និងខ្សែផ្សេងៗទៀត ដែលចងភ្ជួរលើបង្គោលអគ្គីសនី ដោយគ្មានសណ្តាប់ធ្នាប់ ខុសលក្ខណៈបច្ចេកទេស ដេីម្បីធានានិរន្តរភាព និងស្ថិរភាពការផ្គត់ផ្គង់ចរន្តអគ្គីសនី ជូនអតិថិជន ក៏ដូចជាការពារ និងជៀសវាងការឆេះរាលដាលដល់ខ្សែបណ្តាញអគ្គីសនី ដែលអាចបង្កជាអគ្គីភ័យ ។
បន្ថែមលើនេះ អគ្គីសនីខេត្តព្រះសីហនុ ក៏បានអំពាវនាវដល់ក្រុមហ៊ុនខ្សែកាបអុីនធឺណែត ក្រុមហ៊ុនខ្សែកាបអុបទិក និងក្រុមហ៊ុន ដែលមានខ្សែភ្ជួរលើបង្គោលអគ្គីសនីទាំងអស់ ក្នុងខេត្តព្រះសីហនុ ត្រូវត្រួតពិនិត្យលក្ខណៈបច្ចេកទេស និងរៀបចំខ្សែបណ្តាញរបស់ខ្លួនឡើងវិញ ឲ្យមានសណ្តាប់ធ្នាប់ត្រឹមត្រូវតាមលក្ខណៈបច្ចេកទេស ដោយអនុលោមតាមកិច្ចសន្យា ដើម្បីជៀសវាងមានការឆេះបណ្តាលឲ្យមានអគ្គីភ័យកេីតឡេីង ៕ ដោយ ៖ ដែន សីមា