ខេត្តស្វាយរៀង ៖ លោកជំទាវកិត្តិសង្គហបណ្ឌិតម៉ែន សំអនឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភានិងអធិការកិច្ចនៅព្រឹកថ្ងៃទី៦ខែឧសភាឆ្នាំ២០១៩បានអញ្ជើញចូលរួមក្នុងពិធីមិទ្ទីញរំឮកខួបទី១៥៦ ទិវាពិភពលោក កាកបាទក្រហម អឌ្ឍចន្ទក្រហម ក្រោមប្រធានបទ “ខ្ញុំស្រឡាញ់កាកបាទក្រហមកម្ពុជា” ដែលបានរៀបចំឡើងដោយសាខាកាកបាទក្រហមកម្ពុជា ខេត្តស្វាយរៀងដោយមានការជួយឧបត្ថម្ភគាំទ្រពីសប្បុរសជនបានថវិការចំនួនជាង៥៧មុឺនដុល្លារ។
លោកជំទាវម៉ែន សំអនថ្លែងនូវការផ្តាំផ្ញើរសាកសួរសុខទុកពីសំណាក់សម្តេចតេជោហ៊ុន សែននាយករដ្ឋមន្ត្រីនៃកម្ពុជានិងសម្តេចកិត្តិព្រឹទ្ធបណ្ឌិតប៊ុនរ៉ានីប្រធានកាកបាទក្រហមកម្ពុជាជូនដល់អង្គពិធីផងដែរ។
លោកជំទាវម៉ែន សំអនបានបញ្ជាក់ថាអង្គមិទ្ទីញយើងនាពេលនេះ ពិតជាមានសារៈសំខាន់សម្រាប់សាខាកាកបាទក្រហមកម្ពុជា ខេត្តស្វាយរៀង ក៏ដូចជាសម្រាប់អាជ្ញាធរខេត្ត និងប្រជាជនទូទាំងខេត្ត ដើម្បីបុព្វហេតុមនុស្សធម៌ សំដៅជួយដល់ជនរងគ្រោះ និងជនងាយរងគ្រោះ តាមរយៈការជួយសម្រាលជនរងគ្រោះដោយគ្រោះមហន្តរាយនានា និងការថែទាំសុខភាព តាមសហគមន៍ និងសកម្មភាពមនុស្សធម៌ផ្សេងទៀត។
លោកជំទាវកិត្តិសង្គហបណ្ឌិតម៉ែន សំអនបានបន្តថា ក្នុងនាមរាជរដ្ឋាភិបាល លោកស្រីសូមអំពាវនាវ ដល់សប្បុរសជនទាំងអស់សូមបន្តកិច្ចខិតខំ ចូលរួមចំណែកជួយ និងសហការគ្នាឱ្យបានយ៉ាងសកម្ម និងរស់រវើកឱ្យប្រែក្លាយជាកម្លាំងចលកររបស់កាកបាទក្រហមកម្ពុជា សម្រាប់ដោះស្រាយ រាល់បញ្ហាប្រឈមទាំងឡាយរបស់ប្រជាជន ក្នុងអត្ថន័យ បាវចនា សង្គ្រោះជីវិត ផ្លាស់ប្តូរផ្នត់គំនិត (ធ្វើឱ្យបានកាន់តែច្រើនជាងមុន ធ្វើឲ្យបានកាន់តែល្អជាងមុន ធ្វើឲ្យបានកាន់តែស៊ីជម្រៅ និងទៅឲ្យបានកាន់តែឆ្ងាយជាងមុន) ដោយឈរលើគោលការណ៍គ្រឹះទាំង៧របស់ចលនា ក្នុងគ្រប់កាលៈទេសៈ តាមទិសស្លោក “ទីណាមានទុក្ខលំបាក ទីនោះមានកាកបាទក្រហមកម្ពុជា” “រួមកម្លាំងគ្នាដើម្បីមនុស្សធម៌” “វប្បធម៌ចែករំលែកចាប់ផ្តើមពីខ្ញុំ “រួមគ្នាអនុវត្ត” “ថ្ងៃនេះថ្ងៃស្អែកគ្មានគ្រោះថ្នាក់ចរាចរណ៍ គ្មានគ្រោះអគ្គីភ័យ” “ការលើកកម្ពស់សុខភាពស្ត្រី ទារក និងកុមារ គឺជាគន្លឹះដ៏សំខាន់ក្នុងការអភិវឌ្ឍប្រកបដោយចីរភាព” ។
លោកជំទាវក៏បានផ្តាំផ្ញើដល់អាជ្ញាធរ គ្រប់លំដាប់ថ្នាក់ ពិសេសថ្នាក់ដឹកនាំសាខា អនុសាខា ត្រូវយកចិត្តទុកដាក់ជាប្រចាំតាមដានសភាពការណ៍ដែលបានកើតឡើង ជាពិសេសករណីគ្រោះមហន្តរាយផ្សេងៗ ដែលប្រជាពលរដ្ឋរស់នៅតាមសហគមន៍មូលដ្ឋានរបស់ខ្លួន ដើម្បីឆ្លើយតប និងដោះស្រាយឱ្យបានទាន់ពេលវេលា ស្របតាមប្រធានបទដែលបានលើកឡើង “កាកបាទក្រហមកម្ពុជា មានគ្រប់ទីកន្លែងសម្រាប់គ្រប់ៗគ្នា មិនទុកនរណាម្នាក់ចោល” ៕ វ៉ៃកូ
