ខេត្តព្រះសីហនុ ៖ ប្រជាពលរដ្ឋរស់នៅសហគមន៍អូរត្រជាក់ចិត្ត និងសហគមន៍បាតខ្ទះមានចំនួនជិត ១០០នាក់ នៅព្រឹកថ្ងៃទី៦ ខែឧសភា ឆ្នាំ២០១៩នេះ បានប្រមូលផ្តុំគ្នានៅរង្វង់មូល ព្រះសង្ឃដឹកដៃក្មេង មានទីតាំងជាប់ផ្លូវជាតិលេខ៤ មានចំងាយប្រហែល ២គីឡូម៉ែត្រ ពីទីតាំងសាលាស្រុកព្រៃនប់ ខេត្តព្រះសីហនុ។
ក្រោយជួបជុំគ្នារួច ប្រជាពលរដ្ឋទាំងពីរសហគមន៍ខាងលើ ក៏បានដង្ហែរក្បួនឆ្ពោះទៅកាន់ ពីមុខបរិវេណសាលាស្រុកព្រៃនប់ ដើម្បីស្នើសុំឲ្យថ្នាក់ដឹកនាំរដ្ឋបាលស្រុកព្រៃនប់ ជួយអន្តរាគមន៍ទៅប្រធានក្រុមហ៊ុនឋានសួគ៌ចំកាត់ឲ្យបើកទ្វាររបង ដែលក្រុមហ៊ុននេះបានបិទផ្លូវមិនឲ្យប្រជាពលរដ្ឋធ្វើដំណើរឆ្លងកាត់ ដោយសំណូមពរបើកផ្លូវនោះ ឲ្យពួកគាត់ធ្វើដំណើរចេញចូល ឬឆ្លងកាត់ឲ្យបានទូលំទូលាយដូចដើមវិញ។
ប្រជាពលរដ្ឋឲ្យដឹងបន្តថា ក្រុមហ៊ុនឋានសួគ៌ បានបិទផ្លូវមិនឲ្យពួកគាត់ធ្វើដំណើរឆ្លងកាត់ មានរយៈពេលប្រមាណ១ខែកន្លងមកហើយៗ ក្រុមហ៊ុនបានឲ្យឆ្លងកាត់ ឬចេញចូលត្រឹមមធ្យោបាយម៉ូតូតែប៉ុណ្ណោះ។
ប្រជាពលរដ្ឋឲ្យដឹងទៀតថា ក្រុមហ៊ុនឋានសួគ៌ ដែលបិទផ្លូវខាងលើ គឺស្ថិតនៅភូមិអូរត្រជាក់ចិត្ត ឃុំសំរ៉ុង ស្រុកព្រៃនប់ ខេត្តព្រះសីហនុ។
យ៉ាងនេះក្តី ចំពោះការស្នើសុំកិច្ចអន្តរាគមន៍ របស់ប្រជាពលរដ្ឋ ពីថ្នាក់ដឹកនាំរដ្ឋបាលស្រុកព្រៃនប់ គឺមិនទទួលបានលទ្ធផលនោះទេ។ ដោយមន្ត្រីរដ្ឋបាលស្រុកព្រៃនប់ ឆ្លើយថា វាហួសពីដែនសមត្ថកិច្ចថ្នាក់ស្រុកត្រូវដោះស្រាយ។ ហើយមន្ត្រីរដ្ឋបាលស្រុកព្រៃនប់ ក៏បានស្នើឲ្យប្រជាពលរដ្ឋ រស់នៅសហគមន៍អូរត្រជាក់ចិត្ត និងសហគមន៍បាតខ្ទះ រៀបចំឯកសារតាមផ្លូវច្បាប់ ដើម្បីដាក់ជូនរដ្ឋបាលខេត្តព្រះសីហនុ ឲ្យជួយរកដំណោះស្រាយ នៅថ្ងៃខាងមុខជាបន្តទៀត ៕ ដោយ៖ ដែន សីមា
