កំពង់ឆ្នាំង ៖ កុមារីម្នាក់ត្រូវបានរន្ទះបាញ់ស្លាប់និងកុមារ៉ា ២ នាក់ទៀតរងរបួសធ្ងន់ ពេលកំពុងជិះកង់ចេញពីសាលារៀន ខណៈមេឃកំពុងភ្លៀង ។
ប៉ូលីសបានអោយដឹងថា ហេតុការណ៍គ្រោះធម្មជាតិនេះបានកើតឡើងកាលពីវេលាម៉ោង៤និង២៥នាទីរសៀលថ្ងៃទី៦ ខែឧសភា ឆ្នាំ២០១៩ នៅចំណុចភូមិខ្សាច់ស ឃុំក្រាំងល្វា ស្រុកសាមគ្គីមានជ័យ ខេត្តកំពង់ឆ្នាំង។
កុមារីរងគ្រោះឈ្មោះព្រុំ រស្មី អាយុ១២ឆ្នាំ ជាសិស្សមានទីលំនៅក្នុងភូមិស្រែសារ ឃុំត្បែងខ្ពស់ ស្រុកសាមគ្គីមានជ័យ ខេត្តកំពង់ឆ្នាំង និង ទៅរៀននៅចំណុចកើតហេតុខាងលើ។ សពត្រូវបានឪពុកម្តាយយកទៅកាន់លំនៅស្ថានរៀបចំធ្វើបុណ្យតាមប្រពៃណី។
ដោយឡែកកុមារ៉ា២នាក់ទៀតនៅមិនទាន់ស្គាល់ឈ្មោះនៅឡើយទេ ។ ពួកគេទាំង២នាក់រងរបួសធ្ងន់ ដោយម្នាក់ចេញឈាមតាមច្រមុះ ត្រចៀក និង ម្នាក់ទន់មួយកំណាត់ខ្លួន ៕ ដោយ ៖ បញ្ញាស័ក្តិ
