ខេត្តកណ្តាល៖ តៃកុងរថយន្តដែល បើកបុកម៉ូតូស្លាប់៤នាក់ ត្រូវបានបញ្ជូនខ្លួនទៅសាលាដំបូងខេត្តកណ្តាល ហើយនៅពេលកំពុងស្ថិតក្រោមការសាកសួររបស់លោក សូ សុវិទ្យា ព្រះរាជអាជ្ញារងអមសាលាដំបូងខេត្តកណ្តល។
នៅរសៀលថ្ងៃទី២៥ ខែធ្នូ ឆ្នាំ២០១៧ កម្លាំងនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តកណ្តាល បានបញ្ជូន តៃកុងរថយន្តបែន បើកបុកម៉ូតូស្លាប់មួយគ្រួសារនៅស្រុកអង្គស្នួល មកដល់សាលាដំបូងខេត្តកណ្តាលហើយ ដើម្បីបន្តរនីតិវិធីទៅតាមផ្លូវច្បាប់។
ជនបង្កឈ្មោះ សេង ចាន់ឌឿន ភេទប្រុស អាយុ២៣ឆ្នាំ មុខរបរ តៃកុងឡាន ទីលំនៅភូមិព្រពាំងស្យា ឃុំ ស្វាយរំពារ ស្រុកបរសេដ្ឋ ខេត្តពង់ស្ពឺ។ ករណីគ្រោះថ្នាក់ចរាចរណ៍រវាងរថយន្ត និង ម៉ូតូ បណ្ដាលឲ្យស្លាប់៤នាក់ ប្រុស២នាក់នៅនឹងកន្លែងកើតហេតុ បណ្ដាលឲ្យខូចខាតម៉ូតូ១គ្រឿង និងរថយន្ត១ គ្រឿងបន្តិចបន្តួច កាលពីថ្ងៃទីអាទិត្យ ទី២៤ ខែធ្នូ ឆ្នាំ២០១៧ វេលាម៉ោង១៦៖៣០នាទី ចំណុចភូមិព្រៃគោ ឃុំលំហាច ស្រុកអង្គស្នួល ខេត្តកណ្ដាល ផ្លូវជាតិលេខ៤១ ។ រថយន្ត១គ្រឿង នីសសាន់ប្រភេទបែន ពណ៌ខៀវពាក់ផ្លាកលេខ ភ្នំពេញ៣A ២៧៧៧ បើកបរដោយឈ្មោះ សេង ចាន់ឌឿន ដែលបើកពីទិសខាងជើងទៅទិសខាងត្បូង (ថ្នល់ទទឹងទៅកំពង់ត្រាំ )លុះដល់ចំណុចកើតហេតុខាងលើ បានបុកម៉ូតូមួយគ្រឿង ហុងដា ១២៥ ពណ៌ខ្មៅ ពាក់ផ្លាកលេខភ្នំពេញ 1CW-4614 បើកបរដោយឈ្មោះម៉ន ជីមី ភេទប្រុស អាយុ២៦ឆ្នាំមុខរប កម្មករ ( ពាក់មួកសុវត្ថិភាព ) បានឌុប ប្រពន្ធ កូន និងក្មួយ ទី១ ឈ្មោះ ហៀង គឹមសាន ភេទស្រី អាយុ២៤ឆ្នាំ មុខរបកម្មករ ត្រូវជាប្រពន្ធ ( ពាក់មួកសុវត្ថិភាព ) ទី២ ឈ្មោះ ម៉ន សម្បត្តិ អាយុ២ឆ្នាំ ត្រូវជាកូន ក្នុងបន្ទុក។ ទី៣ ឈ្មោះ ខេម ស្រីម៉ី អាយុ ៩ឆ្នាំ ត្រូវជាក្មួយ ( ពាក់មួកសុវត្ថិភាព )អ្នកទាំងបួន មានទីលំនៅភូមិត្រពាំងសុក្រម ឃុំបែកចាន ស្រុកអង្គស្នួល ខេត្តកណ្ដាល បើកពីទិសខាងត្បូងទៅទិសខាងជើង ក្នុងទិសដៅកំពង់ត្រាំទៅថ្នល់ទទឹង ក្នុងទិសដៅបញ្ច្រាសទិសគ្នា ៕ ដោយ ៖ បញ្ញាស័ក្តិ
