ខេត្តស្វាយរៀង ៖ លោកនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានក្រុមការងារចុះជួយស្រុករមាសហែក នារសៀលថ្ងៃទី៧ ខែឧសភា ឆ្នាំ២០១៩នេះ បានដឹកនាំក្រុមការងារសាខាកាកបាតក្រហមកម្ពុជាខេត្តស្វាយរៀងចុះសួរសុខទុក្ខ និងចែកអំណោយដល់គ្រួសាររងគ្រោះដោយខ្យល់កន្ត្រាក់រលំផ្ទះ របើកដំបូលកាលពីថ្ងៃទី៥ ខែឧសភា ឆ្នាំ២០១៩ កន្លងទៅចំនួន ៥៣ គ្រួសារ នៅភូមិត្រពាំងស្មាច់ ឃុំជ្រៃធំ ស្រុករមាសហែក។
ថ្លែងទៅកាន់ប្រជាពលរដ្ឋទាំង ៥៣ គ្រួសារ លោកនាយឧត្តមសេនីយ៍ សៅ សុខាបាននាំនូវការផ្តាំផ្ញើសាកសួរសុខទុក្ខពីសំណាក់សម្តេចតេជោ ហ៊ុន សែននិងសម្តេចកិត្តិព្រឹទ្ធបណ្ឌិតប៊ុន រ៉ានីប្រធានកាកបាទក្រហមកម្ពុជាទីណាមានទុក្ខលំបាកទីនោះពិតជាមានវត្តមានកាកបាតក្រហមកម្ពុជាចុះជួយជានិច្ច។
លោកបានអំពាវនាវដល់បងប្អូនប្រជាពលរដ្ឋទាំងអស់ត្រូវចេះប្រើប្រាស់ទឹកដោយចេះសន្សំ សំចៃនិង មានការប្រុងប្រយ័ត្នចំពោះបាតុភូតគ្រោះធម្មជាតិផ្សេងៗដែលកើតឡើងជាយថាហេតុ ហើយខណះដែលមានភ្លៀង ខ្យល់កន្ត្រាក់ត្រូវរកកន្លែងដែលមានសុត្ថិភាពដើម្បីបញ្ចៀសនូវគ្រោះថ្នាក់ដល់អាយុជីវិតនិងទ្រព្យសម្បត្តិដូចជា ផ្ទះសម្បែងជាដើម។
មួយវិញទៀតរដូវវស្សានិងជិតមកដល់នាពេលខាងមុខសូមប្រជាពលរដ្ឋត្រូវត្រៀមឧបករណ៍សម្រាប់ធ្វើស្រែចម្កាអោយបានគ្រប់គ្រាន់ដើម្បីលើកស្ទួយជីវភាពបានមួយកម្រិតជាពិសេសត្រូវដាំបន្លែរួមផ្សំបន្ថែមទៀតផងដែរ។
លោកនាយឧត្តមសេនីយ៍ ក៏បានជំរុញដល់កងកម្លាំងទាំងអស់នៅស្រុករមាសហែកត្រូវខិតខំការការពារសន្តិសុខសណ្តាប់ធ្នាប់ជូនពលរដ្ឋអោយបានល្អប្រសើរបន្ថែមទៀតនិងអនុវត្តន៍គោលនយោបាយភូមិ ឃុំមានសុវត្ថិភាពទាំង៩ចំណុចអោយទទួលបានជោគជ័យនិងធានាបានគ្មានអំពើលួច ឆក់ប្លន់ ជួញដូរមនុស្សខុសច្បាប់ គ្រឿងញៀននៅមូលដ្ឋានជាដាច់ខាត។នៅក្នុងឱកាសនោះក្រៅពីអំណោយរបស់សាខាកាកបាតក្រហមខេត្តស្វាយរៀងលោកនាយឧត្តមសេនីយ៍សៅ សុខាបានឧបត្ថម្ភដល់គ្រួសាររងគ្រោះបន្ថែមក្នុងមួយគ្រួសារ២០មុឺនរៀលនិងឧបត្ថម្ភថវិការមួយចំនួនដល់កងកម្លាំងទាំងបីប្រភេទ រួមជាមួយប្រជាការពារភូមិដែលបានជួយជុសជុលផ្ទះដល់ពលរដ្ឋដែលរងគ្រោះផងដែរ ៕ វ៉ៃកូ
