សិស្សសាលាម្នាក់បានស្លាប់បាត់បង់ជីវិត និងជាច្រើននាក់ទៀតរងរបួស នៅក្នុងហេតុការណ៍បាញ់ប្រហារនៅសាលាមួយកន្លែងស្ថិតក្នុងរដ្ឋ Colorado សហរដ្ឋអាមេរិច។
ជនសង្ស័យចំនួន ២នាក់ត្រូវបានចាប់ខ្លួន ដែលពួកគេទាំងពីនាក់ជាសិស្សនៅសាលា The STEM School Highlands Ranch ដែលជាកន្លែងកើតហេតុ។ ប៉ូលីសបញ្ជាក់ថា មិនមានជនសង្ស័យផ្សេងជាប់ពាក់ព័ន្ធនឹងការបាញ់នោះឡើយ។
សាលា The STEM School Highlands Ranch ស្ថិតក្នុងរដ្ឋ Colorado មានសិស្សសរុបទាំងអស់ចំនួន ១.៨០០នាក់។ សាលានេះត្រូវបានបិទទ្វារអស់រយៈពេលជាច្រើនម៉ោង ខណៈដែលមានការដាក់ពង្រាយប៉ូលីសជាច្រើននៅទីនោះ។
សូមបញ្ជាក់ថា ការបាញ់បោះនៅសាលារៀន នៅអាមេរិច តែងកើតមានជាញឹកញាប់។ កាលពីខែកុម្ភៈ ឆ្នាំមុន មានការបាញ់ប្រហារមួយបានកើតឡើងនៅក្នុងវិទ្យាល័ហយ Marjory Stoneman Douglas ស្ថិតក្នុងទីក្រុង Parkland ដែលបណ្តាលអោយមនុស្សចំនួន ១៧នាក់ស្លាប់ និងជាច្រើននាក់ទៀតរងរបួស។
នៅចុងខែមុន សភានៅរដ្ឋ Florida បានអនុម័តច្បាប់ ដោយអនុញ្ញាតិឲ្យគ្រូបង្រៀនកាន់កាប់អាវុធបាន នៅក្នុងថ្នាក់រៀន ដើម្បីជួយពង្រឹងសន្តិសុខ៕
អត្ថបទប្រែសម្រួលដោយ៖ សុភ័ក្រ
ប្រភព៖ channelnewsasia