ភ្នំពេញ ៖ សម្តេចតេជោ នាយករដ្ឋមន្ត្រី ជំរុញលើកទឹកចិត្តដល់អ្នកមានទ្រព្យធនច្រើន ចែករំលែកដល់ជនដែលងាយរងគ្រោះ ឬអ្នកក្រីក្រ ដើម្បីធានាពីសេចក្តីសុខក្នុងសង្គម។ សម្តេចតេជោ ហ៊ុន សែន បានថ្លែងថា សិល្បៈ និងវប្បធម៌នៃការចែករំលែក គឺពិតជាមានអត្ថន័យធំធេងណាស់ សម្រាប់ប្រជាពលរដ្ឋកម្ពុជា។
ក្នុងពិធីប្រារព្ធទិវាពិភពលោកកាកបាទក្រហម ក្រោមប្រធានបទ «ខ្ញុំស្រឡាញ់កាកបាទក្រហមកម្ពុជា» នៅរាជធានីភ្នំពេញ នាថ្ងៃ៨ ខែឧសភានេះ សម្តេច ហ៊ុន សែន បានថ្លែងថា សិល្បៈនៃការចែករំលែកជំរុញឱ្យប្រទេសជាតិមានសុខដុមរមនាមានតាំងពីអតីតកាលមក ។ មុនឆ្នាំ ១៩៧០ សមទ្ធផលជាតិ ដូចជា សាលារៀន ជាដើម សម្តេចបានបញ្ជាក់ថា ៩០ ភាគរយ កើតចេញពីការចែករំលែករបស់សហគមន៍។ បច្ចុប្បន្ន ៥០ ភាគរយចេញពីរដ្ឋាភិបាល និង ៥០ ភាគរយទៀតកើតចេញពីការចែករំលែក។
សម្តេច ហ៊ុន សែន អំពាវនាវឲ្យចលនានេះ ជាសកម្មភាពថ្នាក់ជាតិ តាមពាក្យស្លោកនេះ នូវអ្វីដែលលោកហៅថា ដើម្បីបន្តលើកកម្ពស់សិល្បៈចែករំលែក ជួយដល់ពលរដ្ឋដែលងាយរងគ្រោះ ធានាសុខដុមរមនាសង្គម។
សម្តេចតេជោ បានមានប្រសាសន៍ថា៖ «ទាក់ទិនទៅនឹងជំនួយមនុស្សធម៌ទាំងនេះ ខ្ញុំជឿជាក់ថា ប្រជាពលរដ្ឋរបស់យើងអាចធ្វើបានទៅនឹងទ្រឹស្តីមួយនេះ ហើយទ្រឹស្តីមួយនេះ វាអាចបង្កើតនូវភាពសុខដុមរមនា រវាងអ្នកដែលមានលទ្ធភាព និងអ្នកដែលគ្មានលទ្ធភាព ដើម្បីឆ្លើយតបទៅនឹងតម្រូវការរបស់ប្រជាពលរដ្ឋរបស់យើង»។
សម្តេចតេជោ ហ៊ុន សែន បានថ្លែងអំណរគុណដល់សប្បុរសជនទាំងអស់ ដែលបានចូលរួមចំណែកជួយដល់កាកបាទក្រហមកម្ពុជា ។ សម្តេចតេជោនបានគូសបញ្ជាក់ថា បើប្រជាពលរដ្ឋកម្ពុជាមិនមានសិល្បៈចែករំលែកទេនោះ គឺជារឿងលំបាកណាស់។ សម្តេចតេជោ ហ៊ុន សែន បានថ្លែងថា វប្បធម៌ចែករំលែករបស់ប្រជាពលរដ្ឋ គឺមានគ្រប់វិស័យដែលក្នុងនោះវិស័យពុទ្ធចក្រ បើគ្មានការចែករំលែករបស់ប្រជាពុទ្ធបរិស័ទទេនោះ មិនអាចកសាងទីអារាមបានឡើយ។ ក្នុងវិស័យអប់រំ កាលពីអតីតកាលបើគ្មានការចូលរួមពីប្រជាពលរដ្ឋទេនោះ មិនអាចមានការសាងសង់អគារសិក្សាបាននោះឡើយ។
សម្តេចតេជោបានថ្លែងរំពឹងថា សិល្បៈនៃការចែករំលែកពីអ្នកមានលទ្ធភាព ទៅអ្នកគ្មានលទ្ធភាពនៅតែបន្ត។ សម្តេចតេជោ បានថ្លែងថា វប្បធម៌នៃការជួយគ្នានេះ មិនមែនមានតែក្នុងប្រទេសកម្ពុជានោះទេ គឺមាននៅលើពិភពលោក ពោលមានប្រទេសជាច្រើន បានយកធនធានរបស់គេមកជួយដល់ប្រទេសកម្ពុជា។
សម្តេចតេជោ ហ៊ុន សែន បានថ្លែងថា វប្បធម៌នៃការចែករំលែកមិនមែនមានតែក្នុងក្របខណ្ឌជាតិទេ គឺបានធ្វើនៅក្នុងក្របខណ្ឌទូទាំងពិភពលោកទាំងក្របខណ្ឌទ្វេភាគី និងវេទិកាពហុភាគី។
សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា នៅថ្ងៃទី០៨ ខែឧសភា ឆ្នាំ២០១៩នេះ បានសម្ដែងនូវការកោតសរសើរ និងថ្លែងអំណរគុណ ចំពោះអាជ្ញាធរមូលដ្ឋានទាំងអស់ ដែលបានចូលរួមខិតខំប្រឹងប្រែង រួមចំណែកគាំទ្រដល់កាកបាទក្រហមកម្ពុជា ក្នុងការជួយដល់ពលរដ្ឋរងគ្រោះ។
ការមានប្រសាសន៍បែបនេះរបស់សម្ដេចតេជោ ហ៊ុន សែន បានធ្វើឡើងក្នុងឱកាសដែលសម្ដេច អញ្ជើញជាអធិបតីក្នុងពិធីអបអរសាទរខួប១៥៦ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ដែលធ្វើឡើងនៅទីស្នាក់ការកណ្តាល កាកបាទក្រហមកម្ពុជា ក្នុងរាជធានីភ្នំពេញ ក្រោមប្រធានបទ «ខ្ញុំ ស្រឡាញ់កាកបាទក្រហមកម្ពុជា» នាព្រឹកថ្ងៃទី០៨ ខែឧសភា ឆ្នាំ២០១៩នេះ។
សម្ដេចតេជោ ហ៊ុន សែន បានមានប្រសាសន៍យ៉ាងដូច្នះថា «ខ្ញុំសូមយកឱកាសនេះ ដើម្បីសម្ដែងនូវការកោតសរសើរ ចំពោះអាជ្ញាធរថ្នាក់ក្រោមជាតិទាំងអស់ ដែលបានខិតខំរួមចំណែកគាំទ្រ ដល់កាកបាទក្រហមកម្ពុជា ដែលខ្ញុំតែងតែលើកថា វិធីសាស្ដ្រនៅក្នុងការចាត់ចែង ដឹកនាំគ្រប់គ្រង នៅឯថ្នាក់មូលដ្ឋាន»។
សម្ដេចតេជោ បានបន្ដថា កាកបាទក្រហមមានភាពឈ្លៀសវៃ នៅក្នុងការប្រើប្រាស់តួនាទី របស់អភិបាលខេត្ត ប្រធានក្រុមប្រឹក្សាខេត្ត ឬថ្នាក់ដឹកនាំរបស់ខេត្ត ដើម្បីចូលរួមនៅក្នុងចលនា របស់កាកបាទក្រហមកម្ពុជា ដូច្នេះ មន្ដ្រីសាធារណៈ របស់យើងមួយចំនួន ជាពិសេសនៅតាមខេត្ត បានក្លាយជាសមាជិក និងជាអ្នកបម្រើរបស់កាកបាទក្រហមកម្ពុជា ក៏ប៉ុន្ដែយើងក៏ត្រូវដឹងថា ភារកិច្ចទាំងនោះ ជាភារកិច្ចរបស់អាជ្ញាធរ ដែលត្រូវដោះស្រាយ។
សម្ដេចតេជោ ហ៊ុន សែន បានគូសបញ្ជាក់ថា ដូច្នេះការបំពេញឲ្យគ្នាទៅវិញទៅមក រវាងអន្ដរាគមន៍របស់អាជ្ញាធរ ក៏ដូចជាការធ្វើសកម្មភាព របស់កាកបាទក្រហមកម្ពុជា មានទិសដៅតែមួយ គឺការដោះស្រាយបញ្ហាលំបាក របស់ប្រជាពលរដ្ឋ ជាពិសេសសម្រាប់អ្នកដែលរងគ្រោះ និងអ្នកដែលងាយរងគ្រោះ។
ជាមួយគ្នានោះ ប្រមុខដឹកនាំកម្ពុជា ក៏បានកោតសសើរ ចំពោះយុវជនកាកបាទក្រហមកម្ពុជា ដែលមានបណ្ដាញនៅគ្រប់ទិសទី នៃសាខាកាកបាទក្រហមកម្ពុជា ដែលសម្ដេចអាចចាត់ទុកថា ជាបណ្ដាញព័ត៌មានដ៏ឆាប់រហ័ស ឆ្លើយតបយ៉ាងទាន់ពេលវេលា ចំពោះបញ្ហាគ្រោះធម្មជាតិ។
សម្តេចតេជោ បានថ្លែងថា វប្បធម៌នៃការជួយគ្នានេះ មិនមែនមានតែក្នុងប្រទេសកម្ពុជានោះទេ គឺមាននៅលើពិភពលោក ពោលមានប្រទេសជាច្រើន បានយកធនធានរបស់គេមកជួយ ដល់ប្រទេសកម្ពុជា។ សម្តេចតេជោ បន្ដថា វប្បធម៌នៃការចែករំលែកមិនមែនមានតែក្នុងក្របខណ្ឌជាតិទេ គឺបានធ្វើនៅក្នុងក្របខណ្ឌទូទាំងពិភពលោកទាំងក្របខណ្ឌទ្វេភាគី និងវេទិកាពហុភាគី។
សម្តេចតេជោ ហ៊ុន សែន មានប្រសាសន៍បញ្ជាក់យ៉ាងដូច្នេះថា៖ «ខ្ញុំពិតជាមានមោទកភាព ចំពោះការចូលរួមជាមួយកាកបាទក្រហមកម្ពុជា ដែលសកម្មភាពទាំងអស់នេះបានរួមចំណែកយ៉ាងធំធេង ក្នុងការអនុវត្តគោលនយោបាយគាំពារសង្គមរបស់រាជរដ្ឋាភិបាល ព្រោះថាជនរងគ្រោះត្រូវការជំនួយដែលជាផ្នែកមួយ នៃការគាំពារសង្គមរបស់រាជរដ្ឋាភិបាល ហើយដែលចំណុចនេះមិនមែន គ្រាន់តែឆ្នាំ២០១៨ និងពីនេះតទៅទេ ក៏ប៉ុន្តែកាកបាទក្រហមរបស់យើង បានចាប់ផ្តើមនូវសកម្មភាពឡើងវិញ តាំងពីក្រោយ៧មករា ឆ្នាំ១៩៧៩»។
បើតាមប្រសាសន៍សម្តេចតេជោនាយករដ្ឋមន្ត្រី ប្រជាពលរដ្ឋខ្មែររងគ្រោះជិត ១៤ម៉ឺនគ្រួសារ បានទទួលការជួយសង្គ្រោះពីកាកបាទក្រហមកម្ពុជា។ សម្តេចតេជោបានវាយតម្លៃថា សកម្មភាពសម្បុរសធម៌នេះ គឺជាសកម្មភាពដ៏អង់អាចក្លាហានរបស់កាកបាទក្រហម។
សម្តេចតេជោ ហ៊ុន សែន ក៏បានថ្លែងរំលឹកពីគុណបំណាច់របស់ព្រះបរមរតនកោដ្ឋ ព្រះករុណា ព្រះបាទសម្តេច នរោត្តម សីហនុ ដែលបានខិតខំប្រឹងប្រែងងដឹកនាំសកម្មភាព កាកបាទក្រហមកម្ពុជាកាលពីអតីតកាល។ សម្តេចបញ្ជាក់ថា ជាមហាសំណាងមួយរបស់ប្រទេសកម្ពុជា ដែលសម្តេចព្រះបរមរតនកោដ្ឋ នរោត្តម សីហនុ បានធ្វើចលនាបង្កើតឱ្យមានកាកបាទក្រហមកម្ពុជានេះឡើងផងដែរ។
សម្តេចនាយករដ្ឋមន្ត្រី បានថ្លែងថា «ខ្ញុំសូមយកឱកាសនេះ កោតសរសើរចំពោះសកម្មភាពមនុស្សធម៌កាកបាទក្រហមកម្ពុជា ដែលអម្បាញ់មិញប្រធានកាកបាទក្រហមកម្ពុជា បានធ្វើរបាយការណ៍ទោះបីជារបាយការណ៍នេះសង្ខេបតែយើងអាចដឹងបានពីសកម្មភាពមនុស្សធម៌ ដែលធ្វើសកម្មភាពយ៉ាងធំធេង។ យោងទៅលើរបាយការណ៍នេះ ចំនួនគ្រួសារប្រមាណជិត១៤ម៉ឺនគ្រួសារ ដែលបានទទួលជំនួយសង្គ្រោះពីកាកបាទក្រហមកម្ពុជា។ នេះពិតជាសកម្មភាពពោរពេញទៅដោយភាពអង់អាច និងឆ្ពោះទៅកាន់គោលដៅចំពោះជនដែលងាយរងគ្រោះ»។
សម្តេចបន្តទៀតថា «កាកបាទក្រហមរបស់យើងមានការបែកខ្ញែក ទៅតាមភាគីនីមួយៗមិនទាន់មានការឯកភាពនៅឡើយ តែក្រោមព្រះរាជតម្រិះ និងក្រោមព្រះរាជដឹកនាំដ៏ខ្ពង់ខ្ពស់របស់ព្រះករុណា សម្តេចឪ សម្តេចតារបស់យើង ក៏បានធ្វើឱ្យកម្ពុជាក្រហមភាគីទាំងអស់មានការឯកភាពគ្នា ហើយក៏បានធ្វើសកម្មភាពចាប់ពីពេលនោះ រហូតដល់ពេលនេះ»។
ក្នុងទិវានេះដែរ ក្រុមហ៊ុនមួយចំនួន និងមន្ត្រីរាជការ បានចូលរួមឧបត្ថម្ភទឹកប្រាក់សុទ្ធ ក្នុងនោះមានក្រុមពីរគឺ ក្រុមហ៊ុន ណាហ្គេវើល និងក្រុមហ៊ុនចិន ញូញៀន ដែលទទួលបានដីសម្បទាននៅខេត្តកោះកុង ឧបត្ថម្ភប្រាក់ ១លានដុល្លារដូចគ្នា ចំណែកក្រុមហ៊ុនបុរីពិភពថ្មី របស់លោកឧកញ៉ា ហុង ពីវ នៅតែឈរលំដាប់កំពូលបរិច្ចាគច្រើនជាងគេដដែល ទៅកាកបាទក្រហមកម្ពុជា ៕ ដោយ៖កូឡាប