ភ្នំពេញ ៖ លោកស្រីរ៉ូណាស្ម៊ីត អ្នករាយការណ៍ពិសេស អ.ស.ប.ទទួលបន្ទុកស្ថានភាពសិទ្ធិមនុស្សនៅកម្ពុជា មានជំនួបប្រជុំមួយជាមួយលោក ឆាយ ថន ទេសរដ្ឋមន្ត្រី និងជារដ្ឋមន្ត្រីក្រសួងផែនការ។
លោកស្រី រ៉ូណា ស្ម៊ីត បានថ្លែងថា ខ្ញុំត្រូវបានផ្តល់ព័ត៌មានសង្ខេប អំពីវឌ្ឍនភាពក្នុង ការធ្វើមូលដ្ឋានីយកម្មគោលដៅអភិវឌ្ឍប្រកបដោយចីរភាព នៅក្នុងប្រទេសកម្ពុជា និងការធ្វើផែនការយុទ្ធសាស្ត្រអភិវឌ្ឍជាតិ។ យើងក៏បានពិភាក្សាផងដែរ អំពីការងារដែលបាន និងកំពុងបន្តធ្វើទាក់ទងនឹងការធ្វើជំរឿន និងការប្រមូលទិន្នន័យ ក៏ដូចជា សារសំខាន់ក្នុងការធានា ឲ្យមានការចូលរួមប្រកបដោយបរិយាប័ន្ន នៅក្នុងដំណើរការរៀបចំគោលនយោបាយ ដើម្បីធានាថា គ្មាននរណាម្នាក់ត្រូវបានគេទុកចោល នៅក្នុងការអភិវឌ្ឍន៍របស់ប្រទេសកម្ពុជាឡើយ។
បើតាមការប្រកាសរបស់ក្រសួងផែនការថា នាព្រឹកថ្ងៃអង្គារ ៤កើត ខែពិសាខ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី៧ ខែឧសភា ឆ្នាំ២០១៩ លោកកិត្តិសេដ្ឋាបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ បានអនុញ្ញាតឱ្យ លោកស្រី រ៉ូណា ស្មីត អ្នករាយការណ៍ពិសេស អ.ស.ប.ទទួលបន្ទុកស្ថានភាពសិទ្ធិមនុស្សនៅកម្ពុជា ចូលជួបពិភាក្សាពាក់ព័ន្ធលើការងាររៀបចំផែនការយុទ្ធសាស្ត្រអភិវឌ្ឍន៍ជាតិ(ផ.យ.អ.ជ) ២០១៩_២០២៣ និងផែនការយុទ្ធសាស្ត្រនានា ឆ្លើយតបទៅនឹងក្របខណ្ឌគោលដៅអភិវឌ្ឍន៍ប្រកបដោយចីរភាពកម្ពុជា ២០១៦-២០៣០, ការរៀបចំរបាយការណ៍វាយតម្លៃថ្នាក់ជាតិដោយស្ម័គ្រចិត្ត (Voluntary National Review 2019, VNR 2019) សម្រាប់វេទិកានយោបាយកម្រិតខ្ពស់(High Level Political Forum-HLPF) នៅបុរីញូយ៉ក ក្នុងខែកក្កដា ឆ្នាំ២០១៩ និងលើការងារពាក់ព័ន្ធជំរឿនទូទៅនៅព្រះរាជាណាចក្រកម្ពុជា ឆ្នាំ២០១៩ នាទីស្តីការក្រសួងផែនការ ៕ ដោយ ៖ កូឡាប
ខាងក្រោមនេះជាសេចក្តីប្រកាសព័ត៌មាន ៖
